पाईट, ता. १४ ः पाईट येथील कुंडेश्वर विद्यालयात १९८९-९० मध्ये शिकणाऱ्या माजी विद्यार्थ्यांचा स्नेहमेळावा उत्साहात साजरा करण्यात आला. कार्यक्रमात मारुती भिरूड, बाळकृष्ण बोरकर, सुरेश क्षीरसागर, बाळकृष्ण बोरकर, बाळासाहेब आंधळे, विष्णू दौंडकर या गुरुजनांचा पुष्पगुच्छ देऊन सन्मान करण्यात आला. तसेच, गुरुजनांच्या हस्ते विद्यार्थ्यांनाही गुलाबपुष्प देण्यात आले.
यानंतर, दिगंबर रौंधळ, शिवाकाली खेंगले, गंगुबाई वर्पे, बाजीराव डांगले, काळूराम डांगले, लहू नाईकडे, सुनील साबळे, जितेंद्र गोपाळे, सतीश गोपाळे, राजेंद्र आंद्रे, शंकर खेंगले, सुभाष आहेरकर, चिंतामण शिवेकर, बबन खेंगले, काळूराम तांबे या सर्वांनी शाळेतील मजेशीर किस्से सांगून जुन्या आठवणींना उजाळा दिला. गुरुजनांनीही विद्यार्थ्यांचे मजेशीर किस्से, गमतीजमती सांगितल्या. या बॅचच्या वतीने विद्यालयास एक लॅपटॉप व प्रिंटर भेट देणार असल्याची माहिती दिगंबर रौंधळ यांनी दिली.
मासवडीच्या जेवणाचा मनमुराद आस्वाद घेतल्यानंतर कुंडेश्वर येथील महादेवाचे दर्शन घेऊन कार्यक्रमाची सांगता करण्यात आली. कार्यक्रमाचे सूत्रसंचालन चिंतामण शिवेकर यांनी केले. तर, शिवाकाली खेंगले यांनी आभार मानले.