पाईट, ता. २० : गेली तीन दिवस कोसळत असणाऱ्या मुसळधार पावसाने खेड तालुक्याच्या पश्चिम भागातील धामणे पुलावरून पाणी गेले. त्यामुळे या पुलावरील वाहतूक बंद केल्याची माहिती पोलिस पाटील मंगेश कोळेकर यांनी दिली.
धामणे पूल जुना असून, त्याची उंची अंदाजे १० फूट आहे. खेडच्या पश्चिम भागात सर्वत्र गेली तीन ते चार दिवसांपासून मुसळधार पाऊस कोसळत आहे. त्यामुळे ओढे, नदी, नाले दुथडी भरून ओसंडून वाहत आहेत. याच भागातील भामा आसखेड धरण ९७.४६ टक्के भरलेले असून, त्यातून सुमारे १०६४३ क्यूसेकने पाणी सोडण्यात येत आहे. त्यामुळे धामणे पुलावरून सुमारे दोन फूट पाणी वाहत आहे. सतर्कतेचा इशारा म्हणून या पुलावरील सर्व वाहतूक बंद केली आहे. या ठिकाणी म्हाळुंगे पोलिस ठाण्याच्या वतीने चोख बंदोबस्त ठेवला आहे. या पुलावरून चाकण एमआयडीसीमध्ये काम करणाऱ्या तरुण कामगारांची व भीमाशंकरला जाणाऱ्या भक्त भाविकांच्या गाड्यांची व इतरही वाहतूक मोठ्या प्रमाणावर सतत असते.