पाईट, ता. ११ : आंबोली (ता. खेड) येथील भात शिवारास कृषिअधिकाऱ्यांनी भेट दिली. खेडच्या पश्चिम भागातील भात पिकावर करपा रोग व खोड किडीचा प्रादुर्भाव झाल्याची बातमी बुधवारी (ता.१०) प्रसिद्ध झाली होती. तिची तातडीने दखल घेत खेड तालुका कृषी अधिकारी वैभव विश्वे व नारायणगाव कृषी विज्ञान केंद्रतील कृषितज्ज्ञ दत्तात्रेय गावडे यांनी भात पिकाची पाहणी केली
यावेळी पिकावरील खोड कीड व करपा रोग प्रादुर्भावची पाहणी करून शेतकऱ्यांना मार्गदर्शन केले. खेड तालुका कृषी अधिकारी विश्वे यांच्यासह गावडे, वाडा कृषी मंडल अधिकारी भाऊसाहेब मराडे, गट तंत्रज्ञान व आत्माचे दिनेश सावंत, पाईटचे उपकृषीअधिकारी गणेश विटे, सहायक कृषी अधिकारी जालिंदर मांजरे व प्रदीप ढोरे तसेच आंबोलीचे शेतकरी बाळासाहेब शिंदे, विजय खंडागळे, देवराम शिंदे आदी उपस्थित होते.
खोड कीड व करपा नियंत्रण करिता पिकाला नत्रयुक्त खते अतिप्रमाणात देऊ नये, बांध तणमुक्त ठेवावेत, खोड कीड नर पतंग नियंत्रणाकरिता एकरी १० कामगंध सापळे शेतात उभारावेत, शेतात पक्षी थांबे लावावेत जेणे करून नैसर्गिकपणे किडीचे नियंत्रण होईल, अशा सूचना कृषिअधिकाऱ्यांनी शेतकऱ्यांना दिल्या.
करपा नियंत्रणाकरिता अशी करा फवारणी : २५ ग्रॅम कॉपर ऑक्‍सिक्‍लोराइड किंवा १० ग्रॅम कार्बेन्डाझिम किंवा सहा ग्रॅम ट्रायसायक्‍लोझोल किंवा २५ ग्रॅम मॅन्कोझेब यापैकी कोणतेही एक बुरशीनाशक १० लिटर पाण्यात मिसळून फवारणी करावी. बुरशीनाशकाच्या द्रावणात २० मिलि चिकट द्राव (स्टिकर) वापरावा. रोगाच्या तीव्रतेनुसार दोन ते तीन फवारण्या १५ दिवसांच्या अंतराने घ्याव्यात, असा सल्ला उपस्थित शेतकऱ्यांना दिला.

02618