फुलवडे, ता. २२ ः राजेवाडी (ता. आंबेगाव) येथील ग्रामस्थांनी मंचर-भीमाशंकर रस्त्यावरील राजेवाडी फाटा या ठिकाणी रविवार (ता.२३) रोजी रास्ता रोको आंदोलन करण्याचा निर्णय घेण्यात आला. परंतु, कृषी उत्पन्न बाजार समितीच्या निवडणुकीमुळे आचारसंहिता लागू झाल्याने हे आंदोलन स्थगित करण्यात येत आहे, अशी माहिती राजेवाडी ग्रामपंचायतीच्या सरपंच शुभांगी साबळे यांनी दिली.
पोखरी प्रादेशिक पाणीपुरवठा योजनेचा पाणीपुरवठा विद्युत पुरवठा खंडित केल्याने बंद होता. तो सुरू करण्यात आला. परंतु, तो सुरू राहिलच याची शाश्वती नसल्याने पहिले रास्ता रोको आंदोलन शुक्रवारी (ता. ७) रोजी करण्यात आले होते. त्यावेळी पालकमंत्र्यांनी गुरुवारी (ता.२०) रोजी सर्व विभागांच्या अधिकाऱ्यांची व संबंधित ग्रामपंचायत पदाधिकाऱ्यांची एकत्रित बैठक घेण्याचे आश्वासन दिले होते. परंतु, बैठक न झाल्याने राजेवाडी, गोहे खुर्द, गोहे बुद्रुक, पोखरी, चिखली कोलतावडे या ग्रामपंचायतींनी पुन्हा रविवारी (ता. २३) रोजी रास्ता रोको आंदोलन करण्याचा निर्णय घेतला होता. परंतु, आचारसंहिता लागू झाल्याने हे आंदोलन स्थगित करण्यात येत आहे, असे साबळे यांनी सांगितले.