फुलवडे, ता. २७ : बोरघर (ता. आंबेगाव) येथील आनंद कपूर प्रशिक्षण केंद्रात शाश्वत संस्था मंचर यांच्यामार्फत आंबेगाव, खेड तालुक्यातील आदिवासी भागात चालविल्या जाणाऱ्या १० बालवाडीतील १०४ मुलांना पुण्यातील महिंद्रा आणि महिंद्रा इंटरनॅशनल स्कूल मधील विद्यार्थ्यांच्या वतीने विविध प्रकारच्या खेळण्यांचे वाटप केल्याची माहिती शाश्वत संस्थेच्या विश्वस्त प्रतिभा तांबे यांनी दिली.
या खेळण्यांमध्ये मण्यांच्या पाट्या, चेंडू, विविध कोडी, लिंगोरी, विविध आकार, इंग्रजीतील शब्द आदींचा समावेश होता. खेळणी मिळाल्याने बालकांच्या चेहऱ्यावरचा आनंद ओसंडून वाहत होता. या आनंदात बालवाडीतील मुलांनी विविध प्रकारची नृत्य व गाणी सादर करून पाहुण्यांची मने जिंकली. याप्रसंगी महिंद्रा आणि महिंद्रा स्कूलच्या शिक्षिका माया गुरंग, लॉरेन्स लींब, अर्जुन नायर, आयुष देवलाखी, लक्ष तिवारी, अंश तिवारी, आदित्य सूद, आयुष बगडे, दर्श अगरवाल, आर्यन,किल्ला, सुनील भोर आदी विद्यार्थी, शाश्वत संस्थेच्या बालवाडीतील शिक्षिका अलका लेंभे, सोनाली असवले, नूरजहाँ पठाण, राणी डगळे उपस्थित होत्या.
महिंद्र आणि महिंद्रा इंटरनॅशनल स्कूलच्या विद्यार्थ्यांनी खाऊचे पैसे एकत्र गोळा करून ३० हजार रुपयांची खेळणी खरेदी करून बालवाडीतील मुलांना खेळणी त्याबरोबरच गोद्रे (ता. जुन्नर) येथील प्राथमिक शाळेला ३० लेझीम, झांजरेवस्तीतील युवकांसाठी क्रिकेट संच, उतळेवाडीतील युवकांसाठी हॉलीबॉल संच दिला.
शाश्वत संस्थेच्या विश्वस्त सुलोचना गवारी यांनी प्रास्ताविक; तर, शांताराम गुंजाळ यांनी सूत्रसंचालन केले. अरुण पारधी यांनी आभार मानले.