फुलवडे, ता. १४ : जांभोरी (ता. आंबेगाव) येथील जांभोरी ग्राम विकास फाउंडेशनच्या वतीने जिल्हा परिषद शाळा व हायस्कूलमधील विद्यार्थ्यांना शैक्षणिक साहित्य वाटप करण्यात आले. तसेच सामाजिक क्षेत्रात उल्लेखनीय कामगिरी करणाऱ्या व्यक्तीला ‘जीवन गौरव पुरस्कार’ प्रदान करण्यात आल्याची माहिती फाउंडेशनचे अध्यक्ष पुनाजी पारधी यांनी दिली.
या कार्यक्रमाच्या अध्यक्षस्थानी सरपंच सुनंदा पारधी, तसेच प्रमुख पाहुणे शंकरशेठ शहा हे होते. यावेळी जांभोरी येथील न्यू इंग्लिश स्कूल जांभोरी व जिल्हा परिषदेच्या प्राथमिक शाळेतील एकूण २०० विद्यार्थ्यांना शालेय साहित्याचे वाटप करण्यात आले. त्यानंतर डॉ. अमोल वाघमारे यांना ‘जीवन गौरव पुरस्कार’ देण्यात आला. त्याचप्रमाणे १० वीमध्ये प्रथम तीन क्रमांक मिळविलेल्या विद्यार्थ्यांना प्रकाश केंगले यांच्यावतीने अनुक्रमे तीन, दोन व एक हजार रुपये रोख रक्कम व सन्मानचिन्ह देऊन गौरविण्यात आले. याप्रसंगी सेवानिवृत्त झालेले फाउंडेशनचे कार्याध्यक्ष लिंबाजी केंगले, तानाजी आंबेकर, दिलीप केंगले, रामचंद्र हिले यांचाही सन्मान करण्यात आला. सुरेश केंगले यांनी विद्यार्थ्यांसाठी सन्मानचिन्ह दिले.कार्यक्रमाच्या शेवटी बापू किरवे यांच्याकडून सर्व विद्यार्थ्यांना अल्पोपहार देण्यात आला.
याप्रसंगी खरेदी विक्री संघाचे संचालक श्यामराव बांबळे, प्रा. रूपेश केंगले, नवनाथ केंगले-पाटील, बाळू केंगले, अशोक पेकारी, राजू घोडे, मुख्याध्यापक के.जी. केंगले, माजी उपसरपंच विलास केंगले, तंटामुक्ती अध्यक्ष नामदेव भोकटे, किसन शेळके, किसन पारधी, अंकुश गिरंगे, भीमा केंगले, दुंदा किरवे, दत्ता गिरंगे, सागर काठे, उपाध्यक्ष दिलीप गिंरगे, ज्ञानेश्‍वर पारधी, मुख्याध्यापक मारुती पारधी आदींसह ग्रामस्थ उपस्थित होते. किरण भवारी यांनी सूत्रसंचालन केले व शिवराम केंगले यांनी आभार मानले.