फुलवडे, ता. १८ : जांभोरी (ता. आंबेगाव) येथे मुक्कामी जाणारी एसटी बस अनियमितपणे येत असल्याने प्रवाशांना नाहक त्रास सहन करावा लागत आहे. त्यामुळे ही बस नियमित वेळेत सुटावी याबाबत जांभोरी ग्रामस्थांनी राज्य परिवहन महामंडळाच्या मंचर येथील आगार प्रमुखांना गुरुवारी (ता. १७) निवेदन दिले असून नियमित वेळेत एसटी न आल्यास तीव्र आंदोलन केले जाईल अशा इशारा दिला आहे.
यावेळी बिरसा ब्रिगेड जांभोरीचे अध्यक्ष सुनील गिरंगे, उपसरपंच बबन केंगले, ग्रामविकास फाउंडेशनचे लिंबाजी केंगले, शिवराम केंगले, मारुती केंगले, भीमा केंगले. विकास पोटे, काळूराम कोंढवळे, गोविंद केंगले, प्रदीप पारधी उपस्थित होते.
मंचर येथून जांभोरी कडे जाणारी ही एसटी बस सायंकाळी ६ वाजता सुटते व जांभोरी येथून सकाळी ७ वाजता मंचरकडे रवाना होते. परंतु गेल्या काही दिवसात ही एसटी बस अनियमितपणे सुरु आहे. तर काही वेळेस ही एसटी बस रद्द केली जाते. त्यामुळे शेतकरी, ग्रामस्थ, व्यावसायिक, नोकरदार व विद्यार्थ्यांना नाहक त्रास सहन करावा लागतो.