पिंपळवंडी, ता.११ : जुन्नर तालुक्यात पट्टेरी वाघ आढळल्याचे छायाचित्र सोशल मीडियावर व्हायरल झाले असल्याने नागरिकांमध्ये भीतीचे वातावरण निर्माण झाले होते. सोशल मीडियावर टाकलेल्या छायाचित्रात पट्टेरी वाघ शेतात उभा असल्याचे दिसत आहे. दरम्यान, हे छायाचित्र ‘एआय’ (कृत्रिम बुद्धिमत्ता)चे असल्याचे स्पष्ट झाले आहे.
मंगरूळ येथील रहिवासी नितीन लक्ष्मण मिंडे यांनी त्यांच्या मुलाला पट्टेरी वाघ दिसल्याचे व त्याचे छायाचित्र काढल्याचे वृत्त स्थानिक युट्यूब चॅनेलवर सांगून मुलाखत दिली. याबाबतची माहिती जुन्नर वनविभागाला मिळताच त्या छायाचित्राच्या सत्यतेबाबत खातरजमा करण्यासाठी ओतूरचे वनपरिक्षेत्र अधिकारी चैतन्य कांबळे यांनी कर्मचाऱ्यांसह घटनास्थळी जाऊन परिसराची पाहणी केली. या वृत्ताच्या सत्यतेबाबत संबंधितांकडे कसून चौकशी केली. त्यांनी सांगितले की, घराबाहेर काढलेले वाघाचे छायाचित्र ‘एआय’वर टाकून पाहिले असता तो वाघच असल्याचे उत्तर ‘एआय’द्वारे देण्यात आल्याचे जबाबात तसेच रेकॉर्ड केलेल्या व्हिडिओद्वारे वनविभागास सांगितले. ‘‘खोटी माहिती पसरविल्याने संबंधितांना वनविभागाकडून नोटीस जारी करण्यात आल्या आहेत. अफवा पसरविणे/लोकांमध्ये भीती निर्माण करणे, खोटी माहिती समाजमाध्यमांवर प्रसारित करणे आदी कृत्ये ही भारतीय न्यायसंहिता २०२३ तसेच माहिती तंत्रज्ञान अधिनियम २००० मधील तरतुदिन्वये प्रतिबंधित असल्याने त्याचे उल्लंघन करणाऱ्या व्यक्तीस तीन वर्षापर्यंतच्या कारावासाची तसेच १ लाख रुपयापर्यंतच्या दंडाच्या शिक्षेची तरतूद करण्यात आलेली आहे. या प्रकारचे छायाचित्र सोशल मीडियावर दिसल्यास त्याची पहिल्यांदा खातरजमा करावी ते छायाचित्र खरे आहे की नाही तसेच प्रसारमाध्यमांनी देखील सत्यता पडताळूनच वृत्त प्रसारित करावे,’’ असे आवाहन वनविभागाच्या वतीने करण्यात आले आहे.

2685