पिंपळवंडी, ता. १६ : पिंपळवंडी (ता. जुन्नर) येथे वनविभागाने लावलेल्या पिंजऱ्यात शुक्रवारी (ता. १६) सकाळी कुत्रा जेरबंद झाल्याची घटना घडली आहे. प्रफुल्ल कसबे यांच्या अंगणात काही दिवसांपूर्वी बिबट्या आला असता वनविभागाने खबरदारी म्हणून येथे बिबट्याला पकडण्यासाठी पिंजरा लावला होता. तसेच, भक्ष म्हणून कोंबडी ठेवली होती. अनेक दिवस होऊनही बिबट्या पिंजऱ्यात जेरबंद होत नव्हता. पिंजऱ्याच्या समोर बिबट्याचे पंजे देखील निदर्शनात येत होते. शुक्रवारी सकाळी याच पिंजऱ्यात बिबट्याच्या ऐवजी कुत्रा जेरबंद झाल्याचे निदर्शनात आले. या घटनेची माहिती वनविभागाला कळवली असून, कुत्र्याला स्थानिक तरुणांच्या साहाय्याने पिंजऱ्यातून मुक्त करण्यात आले आहे.

02746