वरवंड, ता. ७ : वरवंड (ता. दौंड) येथे मंगळवारी (ता. ७) पहाटे घराबाहेर आलेल्या एका व्यक्तीचा तीक्ष्ण हत्याराने खून झाला. हुसेन अलिसो तांबोळी (वय ६०), असे त्यांचे नाव आहे.
याबाबत पोलिसांनी माहिती दिली की, हुसेन तांबोळी हे वरवंड येथील पुनर्वसन भागात पत्नी सोबत राहत असत. मंगळवारी पहाटे चार वाजता ते घराच्या बाहेर आले. त्यावेळी अज्ञात व्यक्तीने त्यांच्यावर तीक्ष्ण हत्यारे वार केले. डोक्यात दोन वर्मी घाव बसल्याने त्यांचा जागीच मृत्यू झाला.
याबाबतची माहिती मिळताच यवत पोलिस ठाण्याचे पोलिस निरीक्षक हेमंत शेडगे, पाटस पोलिस चौकीचे सहायक पोलिस निरीक्षक केशव वाबळे, पद्मराज गंपले, स्वप्नील लोखंडे, प्रशांत मदने, संजय नागरगोजे यांनी पोलिस पथकासह घटनास्थळी धाव घेतली. मृतदेह पाहणी करून शवविच्छेदनासाठी पाठवून दिला. परिसराची बारकाईने पाहणी केली. दुपारी अतिरिक्त पोलिस अधिक्षक आनंद भोईटे, उपविभागीय पोलिस अधिकारी राहुल धस, पुणे स्थानिक गुन्हे अन्वेषण विभागाचे पथक, श्वान पथक, ठसे तज्ज्ञ पथक आदींनी घटनास्थळी पाहणी केली. यावेळी काही जणांची पोलिसांनी कसून तपासणी केली. या प्रकरणी पोलिसांनी अज्ञात व्यक्तीविरुद्ध खुनाचा गुन्हा दाखल केला.