पुणे, ता. ९ : भरधाव मोटारीची धडक बसल्याने पादचारी ज्येष्ठाचा मृत्यू झाला. हा अपघात मंगळवारी (ता. ७) सकाळी दहाच्या सुमारास हडपसरमधील मांजरी पार्क परिसरात घडला. या प्रकरणी मोटार चालकाविरुद्ध लोणी काळभोर पोलिस ठाण्यात गुन्हा दाखल करण्यात आला आहे. गौस मोईद्दीन मेहबुबसाब मुजावर (वय ७२, रा. लोणी काळभोर) असे मृत्यू झालेल्याचे नाव आहे. या प्रकरणी सोहेल पठाण (वय २५) यांनी फिर्याद दिली आहे. रात्रपाळी काम संपवून गौस हे रस्त्याने पायी चालले होते. मांजरी पार्क परिसरात रस्ता ओलांडत असताना भरधाव वाहनचालकाने त्यांना धडक दिली. त्यामुळे गौस हे गंभीररीत्या जखमी झाले. उपचारादरम्यान त्यांचा मृत्यू झाल्याचे डॉक्टरांनी घोषित केले.