भोर, ता. २८ : नऱ्हे (ता. भोर) येथील विठ्ठल-रुक्मिणी मंदिरात १ महिन्यापासून चाललेल्या काकड आरतीची समाप्ती झाली.
या निमित्त पंचामृताने सकाळी विठ्ठल-रुक्मिणीची पूजा केली. या पूजेचा मान कांचन राजेंद्र गोळे व ज्योती जयराम वीर यांना दिला. त्यानंतर गावातून भजन गात काकड्याचे नदीत विसर्जन केले. दुपारी सत्यनारायण महापूजा झाली. पूजेसाठीचा मान आश्विन व अमोल जगन्नाथ गोळे आणि मिताली व राहुल विश्वनाथ गोळे या दांपत्यांना होता. त्यानंतर गावाच्या वतीने युवक मित्र बंडातात्या कराडकर यांचे संतपूजन विश्वनाथ ज्ञानोबा गोळे व आमदार संग्राम थोपटे यांचे स्वीय सहाय्यक जगन्नाथ पांडुरंग गोळे यांच्या हस्त केले. गावातील रुक्मिणी ज्ञानोबा गोळे (वय ९०) व शांताबाई पांडुरंग गोळे (वय ९०) यांची मातृतुला धान्याच्या स्वरूपात केली. तांदूळ, ज्वारी, गहू आदी धान्य आळंदी (ता. खेड) येथील संत वारकरी शिक्षण मंडळास दान केले. त्यानंतर सुरेश महाराज सूळ (अकलूज) यांचे कीर्तन झाले. सायंकाळी मंदिरात महाप्रसादाने या कार्यक्रमाची सांगता झाली.