शिरूर, ता. १७ : ज्ञानगंगा इंटरनॅशनल स्कूलच्या थापेमळा (ता. शिरूर) येथील नवीन विस्तीर्ण प्रांगणात झालेल्या सोहळ्यात, आध्यात्मिक व वैद्यकीय क्षेत्रातील मान्यवरांच्या उपस्थितीत महाराष्ट्र लोकसेवा आयोगाचे माजी अध्यक्ष किशोरराजे निंबाळकर यांनी ध्वजवंदन केले.
नवनाथ महाराज माशेरे, हिरामण महाराज कर्डिले, खंडेराय महाराज टोणगे, संभाजी महाराज दरोडे, दादा महाराज ढवळे, किशोर महाराज नवले, दादा महाराज तांबे यांच्यासह डॉ. भाऊसाहेब पाचुंदकर, डॉ. स्वप्नील भालेराव, डॉ. राहुल घावटे, डॉ. शरद ठोंबरे हे तसेच भाजप विधी सेलचे प्रदेशाध्यक्ष ॲड. धर्मेंद्र खांडरे, जिल्हा नियोजन समितीचे सदस्य राहुल पाचर्णे, रांजणगाव एमआयडीसी पोलिस ठाण्याचे पोलिस निरीक्षक महादेव वाघमोडे आदी उपस्थित होते.
देशाचे रक्षण, देशभक्ती हे केवळ सैनिकांचे कर्तव्य नसून प्रत्येकाने आपापल्या परीने देशसेवेत योगदान द्यावे, असे आवाहन किशोरराजे निंबाळकर यांनी केले. स्वातंत्र्यसैनिकांच्या त्यागाचीही त्यांनी यावेळी आठवण करून दिली. यानंतर विद्यार्थ्यांनी देशभक्तिपर गीत, नृत्य, स्वातंत्र्यवीरांवरील भाषणे आणि नाटिका सादर केल्या. ज्ञानगंगा विश्वविद्यालयातील इयत्ता नववीतील बालाजी व्यंकटी उबाळे याचा ॲथेलेटीक्स या खेळातील विशेष उल्लेखनीय कामगिरीबद्दल दोन लाख एक हजार रुपयांचा धनादेश देऊन विशेष सन्मान केला. त्याचे बारावीपर्यंतचे सर्व शिक्षण संस्थेच्या वतीने केले जाईल, अशी घोषणा ‘ज्ञानगंगा’चे अध्यक्ष प्रा. डॉ. राजेराम घावटे यांनी केली. रावसाहेब चक्रे यांनी सूत्रसंचालन केले.
सी. टी. बोरा कॉलेजमध्ये शिरूर शिक्षण प्रसारक मंडळाचे संचालक धरमचंद फुलफगर, विद्याधाम प्रशालेत राजेंद्र भटेवरा, न्यू इंग्लिश स्कूलमध्ये रयत शिक्षण संस्थेच्या मॅनेजिंग कौन्सिलचे सदस्य जाकीरखान पठाण, सेंट जोसेफ इंग्लिश मीडियम स्कूल मधे अनिल पायस, बालाजी इंग्लिश मीडियम स्कूल येथे निवृत्त कॅप्टन विठ्ठलराव वराळ यांनी ध्वजवंदन केले. येथील हुतात्मा स्तंभावर किसनराव जाधव यांनी ध्वजवंदन केले.
कारेगाव (ता. शिरूर) येथे शेततळ्यात बुडणाऱ्या मुलांना वाचविणाऱ्या ऋषिकेश नवले, बापू नवले व सलमान शेख या तरुणांना व्हीजन इंटरनॅशनल स्कूलमधील ध्वजवंदनाचा मान मिळाला. विकास पोखरणा यांच्या हस्ते त्यांचा विशेष सन्मान करण्यात आला. ऑपरेशन सिंदूरमधील सहभागी जवान राजेश गोपाळ यांच्या हस्ते कुंभार आळीत ध्वजवंदन झाले. कुंभार समाजाचे अध्यक्ष योगेश जामदार यांनी त्यांचा सन्मान केला. लाटेआळीत माजी सैनिक विनायक कळमकर, शिरूर बाजार समितीत माजी सैनिक बबनराव पवार यांनी, तर हलवाई चौकात माजी नगराध्यक्ष राजेंद्र क्षीरसागर यांनी ध्वजवंदन केले.