पुणे, ता.२८ ः पूनावाला फिनकॉर्प प्रस्तुत सकाळ स्कूलिंपिक्स १६ वर्षांखालील मुलांच्या फुटबॉल स्पर्धेत
शनिवारी (ता.२९) बंडगार्डनच्या जे.एन.पेटिट टेक्निकल हायस्कूलच्या संघाने पाच गोलांची आतषबाजी करत
भुकूमच्या संस्कृती स्कूलवर दणदणीत विजय मिळविला. जे.एन.पेटिटच्या दक्ष पिल्ले याने अप्रतिम कामगिरी करत चार गोल केले. इतर सामन्यात सदाशिव पेठेतील एसपीएम इंग्लिश स्कूल, हडपसरचा विबग्योर आणि वारजेतील आर्यन्स स्कूलच्या संघांनी प्रतिस्पर्ध्यांना पराभूत केले.
भारती विद्यापीठाच्या फुटबॉल मैदानावर ही स्पर्धा खेळविण्यात येत आहे. पहिल्या सामन्यात भोसरीच्या मास्टर माईंड ग्लोबल इंग्लिश सेकंडरी स्कूलचा मांजरीतील ऑर्किड द इंटरनॅशनल स्कूलने (सीबीएसई) १-० असा विजय मिळविला. त्यात सामन्याच्या सुरुवातील ऑर्किडच्या सूर्यांक सिसोदिया याने संघासाठी विजयी गोल केला. दुसऱ्या सामन्यात ऑर्किडचा हडपसरच्या विबग्योर स्कूलने १-० असा पराभव केला. विबग्योरच्या अबीर यादव याने एका गोलची दमदार नोंद केली. तर जे.एन.पेटिटच्या संघाने संस्कृती स्कूलचा पाच गोलने दारुण पराभव केला. त्यामध्ये जे.एन.पेटिटच्या दक्ष पिल्ले याने सामन्याच्या सुरुवातीपासूनच दमदार गोल करायला सुरुवात केली. त्याने दमदार चार गोल केले, तर दुसरीकडून अद्यान शेख याने एका गोलची नोंद केली. तर वारजेच्या आर्यन्स स्कूलने एरंडवणेच्या अभिनव इंग्लिश मीडियम स्कूलवर २-० असा विजय मिळविला. त्यामध्ये आर्यन्सच्या युवल भोसले याने दुसऱ्या सत्रात एक तर सामन्याच्या शेवटच्या मिनिटाला विनय देसाई यांनी प्रत्येकी एकेक गोलांची नोंद केली. तर काही तासाच्या अंतरावर झालेल्या सामन्यात आर्यन्सने वाघोलीच्या माउंट लिटेरा स्कूलचा २-० असा दारुण पराभव केला. आर्यन्सच्या नीरज बिदकन व सोनित मुदुली यांनी प्रत्येकी एक गोल केला.

समर्थ, आदित्यचे दमदार गोल
सदाशिव पेठ येथील एसपीएम इंग्लिश स्कूल आणि तळेगावच्या हचिंग्स स्कूलमध्ये सामना रंगला. यात एसपीएमने २-० असा विजय मिळविला. विजयी संघातील समर्थ सूर्यवंशी याने ८ व्या आणि आदित्य साठे याने १५ व्या मिनिटाला दमदार गोल केले.