गुनाट, ता. १ : गुनाट (ता. शिरूर) येथे वनविभागाने लावलेल्या पिंजऱ्यात दोन वर्षे वयाच्या मादी जेरबंद करण्यात यश आले आहे. त्यामुळे परिसरातील शेतकऱ्यांनी सुटकेचा निःश्वास टाकला आहे. दरम्यान, गुनाट परिसरात बिबट्याचा वावर होता, तर या भागात जनावरांवर हल्ले करण्याच्या घटना ही घडल्या होत्या. त्यामुळे डोंगरे वस्तीजवळ पिंजरा लावण्यात आला होता.‌ त्यामध्ये भक्ष्यही ठेवण्यात आले होते. भक्षाच्या शोधात असलेला बिबट्या अलगद या पिंजऱ्यात अडकला. जेरबंद बिबट्याला जुन्नर येथील माणिकडोह बिबट निवारण केंद्रात सोडण्यात आले. वनपरिक्षेत्र अधिकारी नीलकंठ गव्हाणे यांच्या मार्गदर्शनाखाली बी. एस. शिंदे, जी.‌एस. डोईफोडे, संदीप गव्हाणे, सुधीर शितोळे, बलसागर अवचिते, यांसह वनविभागाच्या इतरही कर्मचाऱ्यांनी यासाठी मोलाची भूमिका बजावली.