पुणे, ता. २७ ः जिल्हा परिषदेकडून इस्रो आणि नासा या अंतराळ संशोधन संस्थांना भेटीसाठीची दुसरी ऑनलाइन परीक्षा शनिवारी घेतली. ही परीक्षा जिल्ह्यातील एक हजार ५४१ विद्यार्थ्यांनी दिली असल्याची माहिती जिल्हा परिषद प्रशासनाकडून देण्यात आली.
शाळांमध्ये शिकणाऱ्या विद्यार्थ्यांना इस्रो आणि नासा या अंतराळ संशोधन संस्थांना भेटी देण्याची संधी मिळावी, यासाठी जिल्हा परिषदेने तीन टप्प्यांत होणाऱ्या चाचणी परीक्षांचे आयोजन केले आहे. या उपक्रमाच्या पहिल्या टप्प्यात परीक्षेला १६ हजार १२१ विद्यार्थ्यांनी परीक्षेसाठी नोंदणी केली होती. त्यापैकी तब्बल १३ हजार ६७१ विद्यार्थ्यांनी पहिली परीक्षा दिली. या तेरा हजार मुलांमधून प्रत्येक तालुक्यातील सर्वोत्कृष्ट १० टक्के विद्यार्थ्यांची निवड दुसऱ्या परीक्षेसाठी करण्यात आली होती. ऑनलाइन घेण्यात आलेली ही परीक्षा अगोदर ता.१९ जुलै रोजी घेण्यात येणार होती, मात्र केंद्रांची उपलब्धता आणि इतर कारणांमुळे पुढे ढकलली होती. ती शनिवारी (ता.२६) घेण्यात आली. आता तिसऱ्या टप्प्यात आयुकामध्ये मुलाखती होणार आहेत.
ग्रामीण भागातील विद्यार्थ्यांमध्ये वैज्ञानिक दृष्टिकोन विकसित करणे आणि अंतराळ विज्ञानाविषयी गोडी निर्माण करण्याचा आहे. पुण्यातील आंतरविद्यापीठ खगोलशास्त्र व खगोलभौतिकशास्त्र केंद्र (आयुका) या संस्थेच्या मार्गदर्शनाखाली परीक्षेचा अभ्यासक्रम तयार करण्यात आला. सहावी ते आठवी या इयत्तांतील विद्यार्थ्यांना या परीक्षेत सहभाग घेतला आहे. ही परीक्षा पूर्णपणे जिल्हा परिषदेच्या शाळांमधील विद्यार्थ्यांसाठी आयोजित करण्यात आली आहे. यामुळे ग्रामीण भागातील विद्यार्थ्यांनाही राष्ट्रीय व आंतरराष्ट्रीय स्तरावरील विज्ञान संस्थांमध्ये प्रत्यक्ष जाऊन अनुभव घेण्याची संधी मिळणार आहे.