पिरंगुट, ता. २१ : डावजे (ता.मुळशी) येथील श्रीक्षेत्र निळकंठेश्वरला श्रावणी सोमवारच्या महोत्सवाला उत्साहास प्रारंभ झाला आहे. पहिल्या श्रावणी सोमवारनिमित्त शिवपिंडीला फुलांची आकर्षक सजावट केली होती. भाविकांनी दर्शनासाठी पहाटेपासूनच रांग लावायला सुरुवात केली होती.
श्री निळकंठेश्वर ट्रस्टचे अध्यक्ष शिवभक्त शिवदास ऊर्फ बाळासाहेब शंकरराव सर्जे यांच्या हस्ते आज (ता.२१) पहाटे मंदिरातील शिवपिंडीला अभिषेक करण्यात आला. त्यानंतर भाविकांनी दर्शन घ्यायला सुरवात झाली. दरम्यान, श्रावणमासानिमित्त स्वयंभू श्री निळकंठेश्वर पालखी सोहळ्याच्यावतीने अखंड श्री शिवलीलामृत ग्रंथ पारायण सोहळा पार पडला. त्यानिमित्त रोज पहाटे काकड आरती, श्री शिवलीलामृत ग्रंथाचे पारायण, संत तुकाराम गाथा भजन, प्रवचन, हरिपाठ, कीर्तन, हरिजागर आदी कार्यक्रम पार पडले. त्यानिमित्त ताथवडे येथील कीर्तनकार मारुती महाराज पवार यांच्या मार्गदर्शनाखाली गणपत महाराज तापकीर, बाबूलाल महाराज कदम व कान्होपात्रा पवार यांची प्रवचने तसेच देविदास महाराज साखरे, वसंत महाराज भालेराव आणि डॉ. बाबासाहेब महाराज कुटे यांचे कीर्तन झाले. ग्रंथदिंडी प्रदक्षिणा झाल्यावर मारुती महाराज पवार यांचे काल्याचे कीर्तन झाले.

02305