पिरंगुट, ता. ५ : मुठा खोऱ्यातील भोडे (ता. मुळशी) येथील डोंगर भागात जळालेल्या अवस्थेतील पुरुष व्यक्तीचा मृतदेह आढळला आहे. मंगळवारी (ता.४) ही घटना घडली. विठ्ठल तानाजी सकपाळ (वय ५२, रा. भोडे, ता. मुळशी) असे मयत व्यक्तिचे नाव आहे. याबाबत रमेश सोनबा सकपाळ (वय ४५, रा. सकपाळवाडी, भोडे, ता. मुळशी) यांनी पोलिसात माहिती दिली.
पौड पोलिसांनी दिलेल्या माहितीनुसार, मंगळवारी (ता. ४) सायकांळी साडेसहाच्या सुमारास ही घटना उघडकीस आली आहे. भोडे येथील यमुना तानाजी सकपाळ यांचा मयत मुलगा विठ्ठल हा मंगळवारी दुपारी चार वाजता शेताकडे गेला होता. तो परत न आल्याने त्याचा शोध घेतला. परंतु, तो सापडला नाही. त्यानंतर यमुना सपकाळ या शेतामध्ये त्याचा शोध घेण्यास गेल्या. तो सापडला नाही. त्यानंतर त्यांनी शेताच्या मागे असणाऱ्या डोंगरामध्ये विठ्ठलचा शोध घेतला असताना एका ठिकाणावरून धूर येताना दिसला. त्या ठिकाणी मयत विठ्ठल जळालेला आढळला. त्यानंतर ही माहिती पोलिसांत देण्यात आली. पौड पोलिस ठाण्याचे उपनिरीक्षक योगेश जाधव व हवालदार रवींद्र नागटिळक यांच्या पथकाने घटनास्थळी भेट देऊन मृतदेह ताब्यात घेतला. सांयकाळी पौड येथील शासकीय रुग्णालयात शवविच्छेदन करण्याचे काम सुरू होते. त्याचा अहवाल आल्यानंतर मृत्यूचे कारण समजू शकणार आहे.