पिरंगुट, ता. २४ : जिल्हा पोलिस अधीक्षक कार्यालयाच्या नियोजनामुळे जिल्ह्यातील ग्रामीण भागातील मतमोजणी शांततेत आणि सुरळीत पार पडली. निकालानंतरही दिवसभरात कोणताही अनुचित प्रकार घडला नाही. विधानसभेच्या मतमोजणीसाठी जिल्हा अधीक्षक कार्यालयाने ग्रामीण भागासाठी उपविभागीय अधिकाऱ्यांच्या अधिकारात बंदोबस्ताचे नियोजन केले होते. जिल्ह्यातील विधानसभेच्या नऊ मतदार संघासाठी २२० अधिकारी, १०७० अंमलदार, एक दंगल नियंत्रण पथक तसेच ४ शीघ्र कृती दलाचा बंदोबस्त ठेवला होता. सुदैवाने दिवसभरातील मतमोजणी आणि निकालानंतरही कुठेही अनुचित प्रकार घडला नाही.
याबाबत जिल्हा पोलिस अधीक्षक पंकज देशमुख म्हणाले, ‘‘या निवडणुकीच्या बंदोबस्तासाठी पुणे ग्रामीण पोलिस दलाच्या वतीने नऊ विधानसभा मतदार संघासाठी त्यात्या उपविभागीय अधिकाऱ्यांना नियोजन करायला सांगितले होते. त्यानुसार योग्य नियोजन झाल्याने दिवसभरात सर्वत्र शांततेत मतमोजणी पार पडली. शिवाय निकालानंतरही कुठेही अनुचित प्रकार घडलेला नाही.’’