पिरंगुट : मुठा (ता.मुळशी) येथील भात खाचरात तुटून पडलेल्या तारेमधील विजेच्या प्रवाहाचा धक्का बसून वानर व श्वानाचा जागीच मृत्यू झाला. ही घटना बुधवारी (ता.९) सायंकाळी पावणे सहा वाजण्याच्या सुमारास घडली. येथे वानर व श्वान कसे आले याचे कारण स्पष्ट झालेले नाही. सुदैवाने या घटनेत कोणतीही मानवी जीवितहानी झाली नाही. मुठा येथील लवासा रस्त्यालगत राजेंद्र नवले यांचे मळकाईचे शेत आहे. या शेतातील भाताच्या खाचरात वीज वितरण कंपनीची तार तुटून पडली होती. येथील तरुण हनुमान नवले यांनी ही घटना पाहिल्यावर त्यांनी वीज वितरण कंपनी तसेच भरे येथील वन विभागाला कळविले. वीज वितरण कंपनीने तेथील वीजपुरवठा खंडित केला. पाऊस व अंधार पडल्याने वन विभागाच्या कर्मचाऱ्यांना घटनास्थळी पोचूनही पंचनामा करण्यात अडथळा आला. दरम्यान, गुरुवारी (ता.१०) सकाळी पशू वैद्यकीय अधिकारी, वन विभाग आणि वीज वितरण कंपनीचे प्रतिनिधी यांच्या वतीने पंचनामा केला जाणार आहे.