पिरंगुट, ता. २६ : लवासा (ता. मुळशी) परिसरातील धामण ओहोळमधील लिंग्या घाटातील धबधबा आणि बाँबे पॅाइंट म्हणजे पर्यटकांसह गडप्रेमींचे आवडते ठिकाण ठरत आहे. त्यामुळे वर्षा विहाराचा आनंद लुटण्यासाठी हजारो पर्यटकांची पावले लिंग्या घाटाकडे वळायला लागलीत. कोसळणारा पाऊस, ढगांशी लपंडाव खेळणारी सह्याद्रीची रांग, घाटावरची बोचरी हवा, कारवीत बुजलेल्या वाटा शोधताना आलेला चकवा आणि त्यातून मिळणारा आनंद अवर्णनीय असल्याचे येथे येणाऱ्या पर्यटकांचे म्हणणे आहे.
धामण ओहोळ गावाच्या पश्‍चिमेकडील लिंग्या घाटात सुमारे वीस ते पंचवीस फूट उंचीचा पडझड झालेला आणि मोडकळीस आलेला दगडी सुळका आहे. याच लिंगादेवाच्या खालील उतारावर डोळ्यांचे पारणे फेडणारा हा धबधबा आहे. धामण ओहोळपासून घाटापर्यंत दाट धुक्याची दुलई, अंगावर कोसळणारा पाऊस आणि पायवाटेवरील कधी काटेरी तर कधी मुलायम स्पर्शाच्या झाडाझुडपांतून हलकासा चिखल, मुरूम तुडवीत जाणाऱ्या पर्यटकांना इथली वनश्री आनंद देत आहेत.
बोरीचा ओढा ओलांडल्यावर डावीकडील वाट वाघजाई मंदिर आणि बाँबे पॅाइंटवर जाते. तेथील पठारावरून कुर्डूगड आणि रायगड जिल्ह्यातील निसर्ग न्याहाळता येतो. येथे वीर बाजी पासलकरांच्या वास्तव्यांच्या खुणा असलेला पडझड झालेला वाडा असून तिथे चौथऱ्यांचे दगड, घरे, मंदिर आहे. वाघजाई मंदिरापासून खाली कुर्डूगडाकडे व कोकणात उतरण्यासाठी वाट सुरू होते. माघारी फिरल्यावर विजेच्या टॅावरपासून दुसऱ्या वाटेने लिंगा घाटाकडे जाताना लिंगादेव सुळक्यापासून धबधबा नजरेस येतो. हा धबधबा सरळ रेषेतील उंचावरून कोसळणारा आहे.

पर्यटकांनी घ्यावयाची काळजी
- लिंगा देवाच्या सुळक्यावर चढू नये
- घसरणाऱ्या दगडांवर पाय ठेवून सेल्फी काढू नये
- पार्किंग योग्य ठिकाणी करावे

अधिक माहितीसाठी संपर्क
अडचणीच्या काळात गाइडचे काम पाहणाऱ्या वेदांत पासकर यांना या क्रमांकावर संपर्क साधू शकता - ७०५७७५८६५७

ग्रामपंचायतीच्या वतीने बोरीच्या ओढ्यावर रस्सी बांधणार असल्याने पर्यटकांना सुरक्षित प्रवास करता येईल.
संजय पासलकर, उपसरपंच, धामण ओहोळ