पिरंगुट, ता. १९ : पुणे शहरवासियांची सुमारे दोन महिन्यांहून अधिक कालावधीची तहान भागविणाऱ्या लवार्डे (ता. मुळशी) येथील टेमघर धरण मंगळवारी (ता. १९) पूर्ण क्षमतेने भरले. पुणे शहराला पिण्याच्या पाण्याचा पुरवठा, मुठा खोऱ्यातील शेती आणि पिण्याच्या पाण्यासाठी वरदान ठरलेले हे धरण मंगळवारी सायंकाळी पाच वाजण्याच्या सुमारास शंभर टक्के (३.७१ टीएमसी) भरले. संध्याकाळी सांडव्यावरून पाणी वाहू लागले आहे. गेल्यावर्षी धरण ४ ऑगस्टलाच शंभर टक्के भरले होते. सध्या या धरणामध्ये म्हणजेच १०० टक्के इतका पाणीसाठा झाला आहे. या हंगामात धरण परिसरात मंगळवारी सकाळी झालेल्या नोंदीनुसार एकूण २५६४ मि.मी. इतका पाऊस झाला आहे.