पिरंगुट, ता. २३ : भूगाव (ता. मुळशी) येथील बाह्यवळण रस्त्याचा प्रश्न मार्गी लावण्यासाठी भूगावकरांनी केंद्रीय मंत्री मुरलीधर मोहोळ यांना निवेदन दिले आहे. येथील बाह्य वळणाचा रस्ता गेले अनेक वर्षे रखडला असल्याने वाहतूक कोंडीमुळे स्थानिक ग्रामस्थांसह प्रवासीही हैराण झालेले आहेत.
या रस्त्याबाबत शासनाच्या विविध विभागांना वेळोवेळी निवेदने देऊनही अद्याप हा रस्ता झालेला नाही. त्यामुळे या रस्त्याची समस्या दूर करण्यासाठी निवेदनाद्वारे मागणी केली आहे. यावेळी भूगाव येथील कमी दाबाने, अपुरा व वारंवार खंडित होणारा विद्युत पुरवठा, तसेच ग्रामपंचायतीच्या विविध सेवांसाठी शासकीय भूखंड उपलब्ध करून देण्याबाबतही निवेदन देण्यात आले.
यावेळी ग्राम पंचायत अधिकारी जे. एम. भोंग, जिल्हा परिषदेचे गटनेते व नियोजन मंडळाचे सदस्य शांताराम दादा इंगवले, पोलिस पाटील संघटनेचे माजी अध्यक्ष कालिदास इंगवले, ज्येष्ठ नेते विलास इंगवले, भाजप महाराष्ट्र प्रदेश राज्य परिषद सदस्य वैशाली मनोहर सणस, भोईणी ग्रामपंचायतीचे सरपंच राजेंद्र दबडे, सचिन अमराळे, राहुल इंगवले, मनोहर सणस, वरिष्ठ लिपिक उत्तम मिरगे, रूपेश सुर्वे, दत्ता सुर्वे आदी उपस्थित होते. यावेळी विविध प्रश्न मार्गी लावण्याबाबत सकारात्मक चर्चा झाल्याचे मनोहर सणस यांनी सांगितले.