पिरंगुट, ता. २९ : लवळे (ता. मुळशी) येथील अॅनिमियामुक्त गाव शिबिराला महिलांनी उत्स्फूर्त प्रतिसाद दिला. मुख्यमंत्री समृद्ध पंचायत राज अभियानांतर्गत येथील ग्रामपंचायत कार्यालयात पार पडलेल्या या शिबिरात महिलांची मोफत सर्वरोग निदान तपासणी करण्यात आली. ३७६ महिलांनी या शिबिराचा लाभ घेतला.
सर्वसाधारण आजारांची तपासणी करून त्यावर औषधोपचार करण्यात आले. शिबिरामध्ये रक्त तपासणी, रक्तदाब, साखर, स्त्री रोग चिकित्सा, नेत्ररोग, गरोदर माता तपासणी, कर्करोग आणि आरोग्य विषयक समुपदेशन करण्यात आले. डॉ. श्रुती कांडगाळे यांनी महात्मा फुले विद्यालयातील विद्यार्थिनींचे आरोग्य विषयक समुपदेशन केले. पंचायत समिती मुळशी येथील आरोग्यविस्तार अधिकारी दिनेश पंचवाघ, भुकूम येथील आरोग्यवर्धिनी उपकेंद्रांच्या समुदाय आरोग्य अधिकारी स्वाती गाडे, चंद्रकांत शेकडे, अनिता मदने, सोनाली सातव, रंजना चव्हाण यांनी शिबिरासाठी मदत केली.
सिंबायोसिस हॉस्पिटलचे नेत्रतज्ज्ञ डॉ. अमोल कुलकर्णी, ऋतुजा वेळकुंडे, अस्थिरोग तज्ज्ञ डॉ. रवीना चावरे, बालरोग तज्ज्ञ डॉ. वैष्णवी परदेशी, त्वचारोग तज्ज्ञ डॉ. अंजली जोग, स्रीरोग तज्ज्ञ डॉ. श्रुती कांडगाळे यांनी सहकार्य केले.