पिरंगुट , ता. २२ : भरे (ता. मुळशी) येथील मुळा नदीवरील पुलाला संरक्षक लोखंडी जाळ्या बसविल्याने वाहनचालकांसह प्रवासी खूष झाले आहेत. लोखंडी जाळ्यांसह या पुलावरील रस्ताही पक्का व चकाचक केला आहे. या पुलावर बसविलेल्या या संरक्षक जाळ्यांमुळे अपघातांचा धोका कमी झाला असून, प्रदूषणालाही काही अंशी आळा बसणार आहे. सध्या या पुलावरील प्रवास आता सुरक्षित, आल्हाददायी व आनंददायी झाला आहे.
मुळा नदीवरील पुलाला संरक्षक जाळ्या बसविण्याची मागणी यापूर्वी ग्रामपंचायतीने केली होती. येथील भरे- घोटावडे रस्त्यावर मुळा नदीवर असलेल्या पुलाला लोखंडी संरक्षक कठडे आहेत. परंतु, या कठड्यांवरून ये- जा करणारे लोक नदीपात्रात कचरा टाकतात. खास करून गणेशोत्सवाच्या कालावधीत बाहेरून येणारे लोक रस्त्यावरूनच गणपतीचे विसर्जन करतात व निर्माल्य नदीपात्रात टाकून देतात. त्यामुळे नदीचे मोठ्या प्रमाणावर प्रदूषण वाढले होते. या नदीच्या पुलावर सात फुटांहून अधिक उंचीची संरक्षक जाळी बसविल्याने अपघातालाही आळा बसणार आहे. त्यामुळे नदीपात्रात कचरा टाकणाऱ्यांचे प्रमाणही कमी होणार आहे.

05160