पिरंगुट, ता. ५ : ‘‘मुळशी तालुक्यात यावेळी परिवर्तनाची लाट असून, त्याची सुरुवात शिवसेना उद्धव बाळासाहेब ठाकरे पक्षाच्या पिरंगुट- भूगाव गट व गणापासून होणार आहे. जिल्हा परिषदेचे उमेदवार आबासाहेब ऊर्फ माधवराव पांडुरंग शेळके, भूगाव गणाचे उमेदवार अनिल पवार व पिरंगुट गणाचे उमेदवार रामदास गोळे यांचा विजय निश्चित आहे. यापूर्वी याच गटातून दोन वेळा शिवसेनेच्या उमेदवारांचा निसटता पराभव झाला. याच गटातून व त्याच पक्षाकडून स्वतःचे भविष्य अजमावण्यासाठी जिल्हा परिषदेसाठी शेळके नव्या दमाने उभे असून, पंचायत समितीसाठीचेही दोन्हीही उमेदवार सक्षम आहेत. सर्व उमेदवारांच्या पाठीशी शिवसैनिक एकदिलाने उभे आहेत. शिवसैनिकांची ताकद व मतदारांची साथ यांमुळे विजय सुकर झाला आहे. यावेळी संपूर्ण तालुक्यात ठाकरे शिवसेनेच्या बाजूने मतदारांचा कौल आहे,’’ असा ठाम विश्वास शिवसेना उद्धव बाळासाहेब ठाकरे पक्षाचे ज्येष्ठ नेते नानासाहेब शिंदे यांनी व्यक्त केला.
भूगाव येथील शंभू महादेव व छत्रपती शिवाजी महाराज यांच्या स्मारकासमोर मशाल पेटवून शिवसैनिकांनी मोठ्या संख्येने विजयाचा निर्धार केला. यावेळी आबासाहेब शेळके म्हणाले, ‘‘भूगाव हे गाव पुणे व मुळशीला जोडणारे आहे. शहरालगत असूनही आजही इथे वीज, पाणी, रस्ता, नित्याची वाहतूक कोंडी आदी समस्या असून, त्यावर ठोस उपाययोजना करून त्या सोडविण्याचा आमचा संकल्प आहे.’’ अनिल पवार म्हणाले, ‘‘भूगावमधून वाहणारी रामनदी हा आमचा ऐतिहासिक ठेवा व वारसा आहे. तिचे पुनर्जीवन करण्यासाठी आम्ही सातत्याने प्रयत्न करतोय. येथील वाढते नागरीकरण व त्यासाठीच्या सुविधा देण्यात आपण कमी पडतोय, ही खंत आहे. त्या पुरविण्यासाठी पंचायत समितीच्या माध्यमातून आम्ही शाश्वत प्रयत्न करणार आहे.’’