पिरंगुट, ता. १२ : मुळशी तालुक्यातील वाहतूक कोंडी सोडविण्यासाठी मनसेच्या वतीने बावधनच्या वाहतूक पोलिसांना निवेदन देण्यात आले आहे.
या निवेदनात म्हटले आहे की, पौड रोड, चांदणी चौक, भुगाव, लवळे फाटा, पिरंगुट येथे दररोज मोठ्या प्रमाणावर वाहतूक कोंडी होत असते. त्यामुळे येथे राहणाऱ्या सामान्य नागरिकांना याचा त्रास सहन करावा लागतो. या वाहतूक कोंडी मध्ये अवैधरीत्या प्रवासी वाहतूक करणारे वाहने असतात. ही प्रवासी वाहतूक करणारे वाहन चालक कुठेही थांबून प्रवाशांना गाडीत घेतात. त्यामुळे कोंडी होऊन वाहतुकीचा प्रश्न ऐरणीवर आलेला आहे. हा मार्ग कोकणाकडे जात असल्यामुळे अवजड वाहनेदेखील याच मार्गाने प्रवास करतात. येथे वाहतूक पोलिस व ट्रॅफिक कंट्रोल वॉर्डनची लवकरात लवकर नियुक्ती करावी व वाहतूक सुरळीत करावी. तसेच पिरंगुट घाट परिसरात रस्त्यावर पडलेल्या खडीबाबत तातडीने कारवाई करावी. या रस्त्यावर आवश्यक त्या ठिकाणी लाइट रिफ्लेक्टर बसविण्यात यावेत. घोटावडे फाटा चौक येथील बंद असलेला सिग्नल तत्काळ सुरू करावा. या उपाययोजना तातडीने अंमलात आणाव्यात, अन्यथा महाराष्ट्र नवनिर्माण वाहतूक सेनेच्या वतीने येत्या आठ दिवसांत तीव्र आंदोलन करण्यात येईल.
यावेळी मनसे वाहतूक सेनेचे राज्य उपाध्यक्ष सुनील अंधारे, जिल्हा संघटक अनिल अहिरे, रूपेश कदम, फिरोज शेख, महेश मालुसरे, अर्जुन काळभोर, शुभम शेवाळे, नामदेव वाघमारे, विशाल गोडसे, प्रथमेश कांबळे आदी उपस्थित होते.