पौड, ता. २३ ः मुळशी तालुक्यातील सर्व ग्रामपंचायत कार्यालयात कर्मचाऱ्यांच्या वेळेत उपस्थितीसाठी बायोमेट्रिक सिस्टीम, तसेच सीसीटीव्ही (ऑडिओ आणि व्हिडिओ) रोटेड कॅमेरे बसवावेत, अशी मागणी ज्ञानमाता सेवाभावी संस्था संचालित माहिती अधिकारी नागरी समूहाचे तालुका अध्यक्ष मधुकर थोरवे, पुणे शहर प्रचार प्रमुख संदीप जोरी, तालुका संघटक अनिल सपकाळ यांनी गटविकास अधिकारी सुधीर भागवत यांना निवेदनाद्वारे केली.
तालुक्यातील बऱ्याच ग्रामपंचायत कार्यालयात अधिकारी, तसेच कर्मचारी वेळेवर येत नाहीत. त्यामुळे गावातील नागरिकांना कार्यालयात येऊन अधिकारी व कर्मचारी याची वाट पाहत बसावे लागते. तसेच प्रशासकीय दृष्ट्या हे योग्य नाही. यावर आळा घालण्यासाठी तालुक्यातील ग्रामपंचायतीमध्ये बायोमेट्रिक प्रणाली सुरू करावी. कर्मचाऱ्यांच्या येण्याजाण्याच्या वेळेचे बायोमेट्रिक पंचिंग व्हावे.
अनेकवेळा ग्रामपंचायत कर्मचारी वर्ग यांची नागरिकांसोबत गैरवर्तणूक करतात. काही नागरिकही ग्रामपंचायत अधिकारी, कर्मचारी यांच्यासोबत असभ्य भाषेत वर्तन करतात. ग्रामपंचायत कार्यालय कारभारात पारदर्शकता वाढणे गरजेचे आहे. कर्मचारी व नागरिकांसोबत होणारे वादविवाद रोखण्यासाठी, तसेच नागरिकांच्या मूलभूत हक्क सुरक्षित व अबाधित राहण्याकरिता, ग्रामपंचायत अधिकारी व कर्मचारी यांच्या सुरक्षेच्या दृष्टीने कार्यालयात सीसीटीव्‍ही कॅमेरा लावणे गरजेचे आहे. राज्य सरकारच्या परिपत्रकाला कचऱ्याची टोपली दाखवून काही ग्रामपंचायतींनी कार्यालयाच्या दालनात वातानुकूलित यंत्रणा बसविण्यात आली आहे. या यंत्रणेसाठी येणारा वीजबिलाच्या खर्चाची जनतेच्या करातील पैशातून उधळपट्टी केली जात आहे. याबाबत चौकशी करून योग्य ती कार्यवाही करावी, अशी मागणी या संस्थेने केली आहे.