पौड, ता. ४ : पौड (ता. मुळशी) येथील तहसील कचेरीतील ई- अभिलेख कक्षात सर्वसामान्य मुळशीकरांची आर्थिक आणि मानसिक लूट केली जाते. शासकीय फी व्यतिरिक्त अनाठायी पैसे घेतले जातात. कागदपत्रे वेळेत न देता नागरिकांना हेलपाटे मारायला लावले जातात, अशा तक्रार माहिती अधिकारी नागरिक समूह संस्थेचे प्रचार प्रमुख संदीप जोरी यांनी केली आहे.
तहसीलदार कचेरीतील ई- अभिलेख कक्षात महसूलच्या विविध अभिलेखांचे जतन केले जाते. लोकांच्या मागणीनुसार शासनाने ठरविलेली फी घेऊन ठराविक कालावधीत या अभिलेखाच्या प्रती नागरिकांना द्यायच्या, अशा महसूल खात्याच्या सूचना आहेत. मात्र, पौडच्या तहसील कचेरीतील ई- अभिलेख कक्षात मनमानी कारभार चालू असल्याची जोरी यांची तक्रार आहे. अनेक लोकांच्या तक्रारीवरून त्यांनी तहसीलदारांना निवेदन दिले आहे. या अभिलेख कक्षात नागरिकांना कागदपत्रे वेळेत दिली जात नाहीत. कागदपत्रांसाठी लांबवरच्या तारखा दिल्या जातात. दिलेल्या तारखेला कागदपत्रे मिळत नसल्याने नागरिकांना वेळ आणि पैसा खर्च करून हेलपाटे मारायला लागतात. फाइल सापडत नाही, कागदपत्रे जुनी आहेत. सर्व्हर बंद पडलाय, वीज नाही, अशा सबबी सांगत कार्यालयात चकरा मारायला लागतात.
कोणत्याही कागदपत्रांसाठी शासकीय फी न आकारता जास्तीचे पैसे मागितले जातात. त्यामुळे या कक्षात नागरिकांची आर्थिक आणि मानसिक पिळवणूक केली जाते. चकरा मारून आणि नाहक पैसा आणि वेळ खर्च झाल्याने मुळशीकर वैतागले आहेत. नागरिकांना होणारा हा मनस्ताप थांबवावा, अशी मागणी जोरी यांनी केली आहे. याबाबत नव्यानेच रुजू झालेले तहसीलदार विजयकुमार चोबे काय कार्यवाही करतात? याकडे नागरिकांचे लक्ष लागले आहे.