पौड, ता. 6 : पुणे जिल्हा परिषदेच्या शिक्षण विभागाने पाचवी ते आठवीपर्यंत शिक्षण घेणाऱ्या गरजू विद्यार्थिंनींसाठी सायकल बॅंक हा नाविण्यपूर्ण उपक्रम सुरू केला आहे. सायकलचा आधार, भविष्याला आकार या संकल्पनेतून सुरू केलेल्या या उपक्रमाच्या प्रभावी अमंलबजावणीसाठी मुळशी पंचायत समितीने कंबर कसली आहे. तालुक्यातील दानशूर तसेच समाजसेवी संस्थांना सायकली देण्यासाठी गटविकास अधिकारी सुधीर भागवत, गटशिक्षणाधिकारी दत्तात्रेय भालेराव यांनी आवाहन केले आहे. दानशूर व्यक्ती, संस्था, कंपन्यांचा सीएसआर निधी या माध्यमातून नवीन सायकली गोळा करायच्या. त्या विद्यार्थिंनींना शिक्षणासाठी वापरावयास द्यावयाच्या. त्यांचे शिक्षण पूर्ण झाल्यानंतर पुन्हा त्या गोळा करून दुसऱ्या गरजूंना द्यायच्या असा उपक्रम जिल्हा परिषदेने सुरू केला आहे. याच उपक्रमाला अनुसरून मुळशी पंचायत समितीचे गटविकास अधिकारी सुधीर भागवत, गटशिक्षणाधिकारी दत्तात्रेय भालेराव यांनी सायकली मिळविण्यासाठी तयारी सुरू केली आहे. आजी, माजी लोकप्रतिनिधींच्या माध्यमातून कंपन्यांना भेटी देवून त्यांना सायकली देण्यासाठी प्रेरीत करीत आहेत. दानशूरांनी 15 ऑगस्टला स्वातंत्र्यदिनाच्या दिवशी आपल्या गावातील प्राथमिक शाळांमध्ये सायकली द्याव्यात, याबाबत 9404421427 या भ्रमणध्वनीवर संपर्क साधावा, असे आवाहन भागवत यांनी केले आहे.