पौड, ता. ६ : महाराष्ट्र राज्य प्राथमिक शिक्षक मध्यवर्ती संघटनेच्या वतीने रविवारी (ता. ९) राज्यातील सर्व जिल्हाधिकारी कार्यालयावर मूक मोर्चा काढण्यात येणार आहे. पुण्यात होणाऱ्या या मोर्चात सर्व शिक्षकांनी सहभागी व्हावे, असे आवाहन जिल्ह्याचे अध्यक्ष नारायण कांबळे यांनी केले आहे.
सर्वोच्च न्यायालयाने सर्व आस्थापनेतील कार्यरत पहिली ते आठवीच्या वर्गांना अध्यापन करणाऱ्या शिक्षकांसाठी पात्रता परीक्षेची (टीईटी) सक्ती करणारा निर्णय दिलेला आहे. याबाबत राज्यातील सर्व आस्थापनेवर काम करणाऱ्या शिक्षक संघटनांची शालेय शिक्षण राज्यमंत्री
डॉ. पंकज भोयर यांच्यासोबत १ ऑक्टोबरला परीक्षेसंदर्भात नागपूर येथे बैठक झाली. बैठकीत डॉ. भोयर यांनी उत्तर प्रदेश सरकारच्या धर्तीवर टीईटी परीक्षेसंदर्भात राज्य सरकार पुनर्विचार याचिका दाखल करेल, अशी ग्वाही दिली होती. त्यामुळे ४ ऑक्टोबरला राज्यातील जिल्हाधिकारी कार्यालयावर होणारे मोर्चे स्थगित करण्यात आले. मात्र सरकारने २३ ऑक्टोबरपर्यंत सर्वोच्च न्यायालयात पुनर्विचार याचिका दाखल केली नाही. परिणामी, शिक्षकांमध्ये सरकारविरोधात संतापाची लाट उसळली आहे.
या मोर्चात महाराष्ट्र राज्य प्राथमिक शिक्षक संघ, पदवीधर व केंद्रप्रमुख संघटना, जुनी पेन्शन हक्क संघटना, शिक्षक भारती, अखिल भारतीय प्राथमिक शिक्षक संघ कास्ट्राईब शिक्षक महासंघ, मागासवर्गीय शिक्षक संघटना, आश्रम शाळा शिक्षक शिक्षकेतर कर्मचारी संघ, मुख्याध्यापक संघ, स्वराज्य शिक्षक संघटना, तळेगाव लोणावळा नगरपालिका संघ लोकशाही आघाडी या संघटना सहभागी होणार असल्याचे कांबळे यांनी सांगितले.