राहू, ता. २३ : हर हर महादेवाच्या जयघोषात मुळा-मुठा नदीच्या कडेला असणाऱ्या उंच अवघड कडा पार करीत तीन तासांच्या अवधीनंतर राहू (ता. दौंड) येथील पंचक्रोशीतील आराध्यदैवत श्री शंभू महादेवाला आणि पिंपळगाव येथील ग्रामदैवत सिद्धेश्वराला हजारो शिवभक्तांनी जलाभिषेक घातला. यात्रेला बुधवार (ता. २२) पासून सुरूवात झाली. पहाटेपासून अनेक शिवभक्तांनी अभिषेक केला. त्यानंतर महापूजा झाली. सकाळी अकराच्या सुमारास ग्रामदैवत शंभू महादेवाच्या मानाच्या कावडीसह सहा कावडी मुळा-मुठा नदीच्या पात्रात घागरीत पाणी आणण्यासाठी गेल्या. दुपारी एकच्या सुमारास कावडी घागरीत पाणी घेऊन आल्यानंतर अवघड उंच कडा पार करत जलाभिषेक केला. तेव्हा हजारो शिवभक्तांनी हर.. हर.. महादेवाचा गजर केला. त्या वेळी हजारो शिवभक्त भक्तीच्या महासागरात न्हाऊन गेला होता.
या वेळी राहू ग्रामपंचायत, समीर जगताप, स्वप्नील जगताप, आनंद मार्केट, समर्थ किराणा यांच्या वतीने मोफत पिण्याच्या पाण्याची व्यवस्था केली होती. समीर आतार, मोहम्मदभाई आतार यांच्यावतीने फटाक्यांची आतषबाजी करण्यात आली.