राहू, ता. २३ : राहू (ता. दौंड) येथील प्राथमिक आरोग्य केंद्रात कार्यरत असलेल्या आरोग्य सेविका उषा सावके यांनी ‘रुग्ण सेवा हीच ईश्‍वर सेवा’ या उक्तीला जागत आपले कर्तव्य पार पाडले आहे. त्यांनी गरोदर महिलेच्या प्रसूतीत असलेले संभाव्य धोके लक्षात घेत सुट्टीवर असतानाही सुखरूप प्रसूती पार पाडली आहे.
राहू नजीक समता नगर येथील सरिता राहुल जाधव (वय २६) यांना शुक्रवारी (ता. १८) असाह्य वेदना होऊ लागल्या. दरम्यान संभाव्य धोके लक्षात घेता आशा सेविका सुनीता ससाणे यांनी आरोग्य सेविका उषा सावके यांना त्वरित संपर्क साधला. त्या रजेवर असतानाही त्यांनी घटनेचे गांभीर्य ओळखत तत्काळ त्या धावून आल्या. त्यांनी सरिता जाधव यांच्या पालावर आशा सेविकेच्या मदतीने व्यवस्थितरीत्या नैसर्गिक प्रसूती केली. प्रसूती झाल्यानंतर आई आणि बाळ सुखरूप असल्याचे सावके यांनी सांगितले. महिलांची नैसर्गिक प्रसूती करण्यात उषा सावके यांचा अनेक वर्षांपासून मोठा हातखंडा आहे. पुढील उपचारासाठी सरिता यांना रुग्णवाहिकेतून प्राथमिक आरोग्य केंद्र राहू येथे पुढील उपचारांसाठी हलविण्यात आले आहे.

कोरोना काळात देखील रात्रंदिवस रुग्णांची प्रामाणिकपणे सेवा केली आहे. या केलेल्या कार्यासाठी नेहमीच कौतुकाची थाप असते. रजेवर असताना माणूस म्हणून मी माझे कर्तव्य बजावले आहे. मला अशा कामापासून नेहमीच ऊर्जा आणि प्रेरणा मिळते. प्रसंग, वेळ, परिस्थिती पाहून शासकीय कर्मचाऱ्यांनी आपल्या कामाची कर्तव्ये बजवावीत.
- उषा सावके, आरोग्य सेविका, प्राथमिक आरोग्य केंद्र राहू (ता. दौंड)

सावके सिस्टर आमच्यासाठी देव दूतासारख्या धावून आल्या. मला प्रसूती दरम्यान वेदना होत होत्या. त्यांनी कुठलाही वेळ न घालवता त्यांनी माझी नैसर्गिक प्रसूती केली. वेळेत आल्यामुळे मला आणि माझ्या बाळाला जीवदान मिळाले आहे. मी त्यांचे आभार मानते
- सरिता जाधव,