राहू, ता. ९ : पांगरूनी धुक्याची चादर.. लाली हलकी आभाळी आली.. शीर शिरली लहर थंडीची जराशी.. धरणीला थोडी करून आली.. कवी अतुल सोळस्कर यांच्या काव्यपंक्तीनुसार दौंडच्या पश्चिम पट्ट्यासह राहूबेट परिसरात सोमवारी (ता. ८) आणि मंगळवारी (ता. ९) पहाटे साडेपाच वाजल्यापासून सकाळी साडेआठ वाजेपर्यंत दाट धुक्याची चादर पसरली होती. पावणे नऊ वाजण्याच्या सुमारास उशिरा दाट झाडीतून सूर्यदर्शन झाले.
दाट धुक्यातून वाघोली- राहू- मार्गे पारगाव रस्त्यावरून वाहतूक धुक्यामुळे संथगतीने सुरू होती. दाट धुके असल्यामुळे चारचाकी, दुचाकी गाड्यांची हेडलाईट, तसेच पार्किंग लाइट सुरू ठेवून वाहतूक सुरू होती. दाट धुक्यामुळे पिकांवर मोठ्या प्रमाणात दवबिंदू साचले होते. ऊस, डाळिंब, इतर तरकारी पिके, तसेच फळबागांना दाट धुक्याचा फटका बसण्याची शक्यता कृषी विभागाच्या वतीने वर्तविण्यात आली आहे. दरम्यान, वाघोली- राहू- पारगावमार्गे पीएमपीएल बससेवा सुद्धा संतगतीने सुरू होत्या.

03277