राहू, ता. ८ : राहू (ता. दौंड) येथील जिल्हा परिषद प्राथमिक केंद्र शाळेत सांस्कृतिक कला महोत्सव आयोजित करण्यात आला होता. यामध्ये अनेक विद्यार्थ्यांच्या कलागुणांना वाव मिळाला.
विद्यार्थ्यांनी आपल्या नृत्याविष्कारातून श्री गणेश, कोळीगीत, लावणी, भक्तीगीत, निसर्गाचे संवर्धन, पारंपारिक कुलदैवत, धार्मिक गीते सादर करत उपस्थितांची दाद मिळवली.
समाजातील विधायक उपक्रम नाटकाद्वारे दाखवण्यात आले. जिल्हा परिषद अंतर्गत नर्सरी, एलकेजी, युकेजीच्या गटातील विद्यार्थ्यांनी नाट्यछटांमधून ग्रामस्थ व पालकांची मने विद्यार्थ्यांनी जिंकून घेतली.
यावेळी उद्योजक सचिन शेलार, माजी सरपंच दिलीप देशमुख यांनी मार्गदर्शन केले. जिल्हा परिषद प्राथमिक केंद्र शाळेचे केंद्रप्रमुख, मुख्याध्यापक, सर्व शिक्षक वृंद, शाला व्यवस्थापन समितीचे अध्यक्ष, उपाध्यक्ष सर्व पदाधिकारी यांचे कार्यक्रमासाठी योगदान लाभले. कार्यक्रमासाठी विविध क्षेत्रातील मान्यवर, पालक व ग्रामस्थ उपस्थित होते.