राजगुरुनगर, ता. ९ : राजगुरुनगर (ता. खेड) येथील आदिवासी शिक्षण संस्थेच्या हुतात्मा राजगुरू विद्यालयाच्या ६१ विद्यार्थ्यांना गुरुवारी (ता. ९) शालेय पोषण आहारातील एका पातेल्यातील भात खाल्ल्यावर विषबाधा झाली. विद्यार्थ्यांना पोटदुखीचा आणि मळमळीचा त्रास जाणवू लागल्याने चांडोली येथील ग्रामीण रुग्णालयात दाखल केले. सुदैवाने सर्वांची प्रकृती ठीक आहे. आमदार दिलीप मोहिते यांनी रुग्णालयात भेट देऊन परिस्थितीचा आढावा घेतला.
भीमा नदीवरील हुतात्मा राजगुरू पुलाजवळ हे हुतात्मा राजगुरू विद्यालय आहे. विद्यालयातील ५ वी ते ८ वीच्या २१५ मुलांना तीन पातेल्यांतून पोषण आहार दिला जातो. गुरुवारी दुपारी १ वाजता नेहमीप्रमाणे विद्यार्थ्यांना पोषण आहारातील मसालेभात वाढण्यात आला. त्यातील एका पातेल्यातील भाताची साबणासारखी चव लागत होती. त्या पातेल्यातील भात ज्या ज्या मुलांनी खाल्ला, त्यांना पोटदुखीचा आणि मळमळीचा त्रास होऊ लागला. खबरदारीचा उपाय म्हणून त्रास होणाऱ्या ६१ विद्यार्थ्यांना चांडोली ग्रामीण रुग्णालयात दाखल केले, असे मुख्याध्यापक अशोक नगरकर यांनी सांगितले.
मुलांना औषध व गोळ्या दिल्या असून, सर्वांची प्रकृती ठीक आहे. चोवीस तास त्यांच्यावर लक्ष ठेवावे लागेल, पण प्राथमिक पातळीवर कोणाची परिस्थिती चिंताजनक वाटत नाही, असे ग्रामीण रुग्णालयाचे वैद्यकीय अधीक्षक महेंद्र गरड यांनी सांगितले.
या प्रकाराने शहरात खळबळ उडाली. पालकांनी रुग्णालयात धाव घेतली. पण, विद्यार्थ्यांना बोलताना पाहून त्यांचा जीव भांड्यात पडला. उपविभागीय अधिकारी विक्रांत चव्हाण, तहसीलदार डॉ. वैशाली वाघमारे, उपविभागीय पोलिस अधिकारी सुदर्शन पाटील, पोलिस निरीक्षक राजकुमार केंद्रे, गटशिक्षणाधिकारी जीवन कोकणे, तालुका आरोग्य अधिकारी इंदिरा पारखे, वैद्यकीय अधिकारी पूनम चिखलीकर आदी रुग्णालयात हजर झाले. चव्हाण यांनी तातडीने सुत्रे हलवून गंभीर परिस्थितीसाठी यंत्रणा सज्ज ठेवली. पण, प्रत्यक्षात तशी वेळच आली नाही. मात्र, पोषण आहार बनविणाऱ्यांवर गुन्हा दाखल करण्याची मागणी पालकांनी केली. संस्कृती महिला स्वयंसहायता बचत गटाकडे या पोषण आहाराचे काम आहे.

पोलिसांनी पंचनामा केला. भाताचे नमुने घेऊन तपासणीसाठी पाठविले. विद्यार्थ्यांचे व अध्यापकांचे जबाब घेतले. तपासणी अहवालानंतर पुढील कार्यवाही केली जाईल.
राजकुमार केंद्रे, पोलिस निरीक्षक