राजगुरुनगर, ता. १६ : पूर्ववैमनस्यातून दोघांनी तरुणावर चाकूहल्ला करून जीवे मारण्याचा प्रयत्न केल्याची घटना खेड तालुक्यातील चास येथे बुधवारी रात्री घडली.
पोलिसांनी दिलेल्या माहितीनुसार, याप्रकरणी गंभीर जखमी झालेला चास येथील तरुण शुभम रत्नपारखी याचे वडील रवींद्र रत्नपारखी यांनी फिर्याद दिली आहे. त्यांचे चासमध्ये ‘मामा वडेवाले’ नावाचे हॉटेल आहे. तेथे बुधवारी रात्री साडेआठ वाजता सिद्धेश खंडू तनपुरे व आदित्य मारुती तनपुरे (दोघेही रा. तनपुरे वस्ती, आखरवाडी, ता. खेड) हे दोघे जण आले. आठ- दहा दिवसांपूर्वी झालेल्या भांडणाच्या कारणावरून त्यांनी शुभम याला, ‘तुला ल‌ई मस्ती आली का? तुला जिवंत सोडत नाही’ असे धमकावले. त्यानंतर आदित्य याने शुभम यास धरले आणि सिद्धेश याने त्याच्या हातातल्या चाकूने शुभम याच्या पोटात व छातीवर वार करून जीवे मारण्याचा प्रयत्न केला‌. त्यांच्या फिर्यादीवरून पोलिसांनी दोघा संशयित आरोपींवर जीवे मारण्याचा प्रयत्न केल्याचा गुन्हा दाखल केला आहे.