राजगुरुनगर, ता. ६ : महसूल सप्ताहानिमित्ताने, खेड तालुक्याने शीव-पाणंद रस्ते खुले करण्याचा आणि दुतर्फा वृक्षारोपण करण्याचा उपक्रम राबवला. या मोहिमेमध्ये एकाच दिवसात १२ शीव-पाणंद रस्ते खुले करण्यात आले. यामुळे २०४२ शेतकऱ्यांना या रस्त्याचा फायदा मिळणार आहे.

रस्ते खुले करण्याच्या मोहिमेसाठी मंडलाधिकारी आणि ग्रामसेवकांनी आठवडाभर गावागावात जाऊन शेतकऱ्यांशी संवाद साधला होता. त्यांच्या समस्या ऐकून घेतल्या आणि सर्वांच्या सहमतीने रस्ते खुले करण्याचे नियोजन केले. या मोहिमेमुळे सुमारे साडेआठ किलोमीटर लांबीचे रस्ते खुले झाले. या रस्त्यांच्या दुतर्फा वृक्षारोपण करण्यात आले. या मोहिमेमुळे शेतातील पिके मुख्य रस्त्यापर्यंत आणणे सोपे होणार आहे. तसेच, शेतीची अवजारे आणि इतर साहित्य शेतापर्यंत पोहोचवणेही आता सुलभ होणार आहे.
जिल्हाधिकारी जितेंद्र डुडी आणि अपर जिल्हाधिकारी सुहास मापारी यांच्या प्रेरणेतून, तसेच उपविभागीय अधिकारी अनिल दौंडे यांच्या मार्गदर्शनाखाली हे अभियान यशस्वी झाले. तहसीलदार प्रशांत बेडसे पाटील, महसूल नायब तहसीलदार राम बिजे, निवासी नायब तहसीलदार चेतन मोरे, सर्व मंडल अधिकारी, ग्राम महसूल अधिकारी, ग्राम महसूल सेवक आणि खेड तालुक्यातील जनतेच्या सहभागातून ही मोहीम पार पडली.

03881