राजगुरुनगर, ता. २१ : खेड तालुक्यातील राक्षेवाडी येथील रहिवासी असलेला तरुण बेपत्ता झाला होता. मात्र त्याचा मृतदेह जैदवाडी (ता. खेड) हद्दीत सापडला आणि त्याचा खून झाल्याचे निष्पन्न झाले. धनंजय मारुती घेवडे (वय ३३, रा. राक्षेवाडी ता. खेड, मूळ रा. कारेगाव, ता. आंबेगाव), असे मृताचे नाव आहे.
पोलिसांनी दिलेल्या माहितीनुसार, मृताचा भाऊ सचिन घेवडे याने यासंदर्भात फिर्याद दिली आहे. मृत धनंजय याच्याशी १६ मार्च रोजी रात्री ८ वाजल्यापासून संपर्क होत नव्हता. त्याचा फोनही लागत नव्हता. कुटुंबीयांनी दोन दिवस नातेवाइकांकडे आणि आजूबाजूला त्याचा शोध घेतला, परंतु तो सापडला नाही. म्हणून तो बेपत्ता झाल्याची खेड पोलिस ठाण्यात त्याच्या पत्नीने तक्रार दिली. दरम्यान १८ मार्च रोजी जैदवाडी गावाच्या हद्दीतील एका जमिनीवर त्याचा मृतदेह आढळून आला. त्याच्या डोक्यात व तोंडावर कोणत्यातरी वस्तूने गंभीर मारहाण करून त्याचा खून कला होता. भावाच्या फिर्यादीवरून खेड पोलिसांनी अज्ञात आरोपींविरुद्ध खुनाचा गुन्हा दाखल केला आहे.