राजेगाव, ता. ३० ः राजेगाव (ता. दौंड) येथील गावठाणातील सर्व रोहित्र एकाच सबस्टेशनवरून म्हणजे मलठण ११ केव्ही या सबस्टेशनवरून जोडण्याची मागणी राजेगाव ग्रामपंचायतीने केली आहे. याबाबत महावितरण दौंडचे उपअभियंता यांच्याकडे निवेदन दिले आहे.

निवेदनात म्हटले आहे की, ग्रामपंचायत राजेगाव येथील खंडोबा ज्योतिबा मंदिरा शेजारील २२ केव्ही रोहित्र असून तो भिगवण सबस्टेशनला जोडलेला आहे. तरीही या ठिकाणी विद्युत पुरवठा वारंवार खंडित होत आहे. त्यामुळे तेथील लोकांना पिण्याच्या पाण्याची लाईट नसल्याने गैरसोय होत आहे. तसेच भिगवण सबस्टेशनवरून येणारी लाईनचे अंतर जास्त आहे. त्यामुळे होल्टेज कमी येत आहे. तसेच गावातील बाकी सात रोहित्र मलठण सबस्टेशन ११ केव्हीला जोडलेले आहेत. तरी राहिलेले दोन्ही रोहित्रे मलठण सबस्टेशन ११ केव्ही त्वरित जोडण्यात यावे.
राजेगाव गावठाणाला वीज पुरवठा करणारे नऊ पैकी सात रोहित्रे मलठण ११ केव्ही सबस्टेशनला जोडलेले असून उरलेले फक्त दोन रोहित्रे हे भिगवण २२ केव्ही या सबस्टेशनला जोडले आहेत. या दोन रोहित्रांमधून ग्रामदैवत राजेश्वर मंदिर, प्राथमिक शाळा, मोबाईल टॉवर्स इत्यादी महत्त्वाच्या ठिकाणांना वीजपुरवठा केला जातो.

भिगवण सबस्टेशनवरून होणारा वीजपुरवठा वारंवार खंडित होतो. त्यामुळे एका वेळी निम्मेगाव उजेडात तर निम्मेगाव अंधारात, अशा परिस्थिती निर्माण होते. तसेच वीज नसल्याने तेथील लोकांना पिण्याच्या पाण्याची गैरसोय होत आहे. त्यामुळे राहिलेली दोन रोहित्रही मलठण सबस्टेशनला जोडण्यात यावीत.
- राजेश राऊत, माजी सरपंच, राजेगाव (ता. दौंड)

ग्रामपंचायतीने केलेल्या मागणीचा विचार करून सर्वेक्षण करण्यात येईल. तसेच राजेगाव गावठाणातील राहिलेले दोन रोहित्रेही मलठण सबस्टेशन ११ केव्हीला जोडण्यासाठी लवकरच कार्यवाही करण्यात येईल.
- अमित धोत्रे, कनिष्ठ अभियंता, महावितरण, दौंड ग्रामीण