राजेगाव, ता.२५ : स्वामी-चिंचोली (ता. दौंड) परिसरातील झालेल्या ढगफुटी सदृश पाऊस पडला. पावसाने पहिल्यांदाच पुणे-सोलापूर महामार्गावरील वाहतूक बंद करावी लागली आहे. स्वामी चिंचोली परिसरातील भिगवण येथील बँक आॕफ महाराष्ट्र येथील पर्जन्यमापक यंत्रात दुपारी चार पर्यंतच विक्रमी १६६ मिलिमीटर पावसाची नोंद झाली आहे.
दौंड तालुक्यात पावसाने हाहाकार माजला असून, सगळीकडे पाणीच पाणी झाले आहे. दक्षिण पश्चिम दिशेला असलेल्या डोंगरावरून मोठ्या प्रमाणावर पाणी ओढ्याला आले होते. अलीकडच्या काळात या भागात मोठ्या प्रमाणावर प्लॉटिंग झाले आहे. संबंधितांनी ओढा अक्षरशः बुजवून टाकला असल्याचे चित्र दिसून येत आहे. त्यामुळे पुणे सोलापूर महामार्गावर असलेल्या ओढ्यात पाणी न बसल्याने मोठ्या प्रमाणावर पाणी महामार्गावर आले होते. दरम्यान, या पाण्यात एक मोटार वाहून गेली असून सुदैवाने कोणतीही जीवितहानी झाली नाही.