राजेगाव, ता. ५ : पुणे जिल्ह्यातील धरणांमधून सोडण्यात आलेल्या पाण्यामुळे भीमा नदीची पातळी वाढल्याने शेतकरी आनंदित झाले असले तरी पुराच्या या पाण्यासोबत प्रचंड प्रमाणात वाहून आलेली जलपर्णी ही मोठी समस्या होऊन बसली आहे. या जलपर्णीचा मोठा साठा राजेगाव-खानवटे (ता. दौंड) येथील भीमा नदीवरील पुलाजवळ येऊन अडकला असून, त्यामुळे पुलावर मोठा दबाव निर्माण झाला आहे.
जलपर्णी पुलाच्या खांबांमध्ये अडकल्याने ही जलपर्णी संपूर्ण पाण्याच्या प्रवाहालाच अडथळा ठरते आहे. परिणामी पुलाच्या सुरक्षिततेवर प्रश्‍नचिन्ह उभे राहिले आहे. काही ठिकाणी जलपर्णीने नदीच्या पृष्ठभागावरच गालिचा तयार केल्याचे दिसून येत आहे. उजनी पुनर्वसन विभाग आणि सार्वजनिक बांधकाम विभाग यांची कोणतीही हालचाल अद्याप दिसून आलेली नाही. पाण्याचा प्रवाह अडल्यास पुलाचा पाया आणि रचनेवर विपरीत परिणाम होण्याची भीती तज्ज्ञ व्यक्त करत आहेत. हा प्रश्‍न मोठ्या प्रमाणावर चर्चिला जात असून, संभाव्य धोका टाळण्यासाठी तातडीने जलपर्णी हटविण्याची मागणी जोर धरत आहे.
नदीपात्र स्वच्छ ठेवण्याची जबाबदारी नेमकी कोणाची? हा प्रश्‍न उपस्थित होत आहे. जलपर्णीचा संपूर्ण विळखा पुलाच्या खालून व नदीच्या विस्तीर्ण परिसरात पसरलेला आहे. हे दृश्य भीतीदायक असून तातडीने उपाययोजना न झाल्यास मोठी दुर्घटना घडण्याची भीती व्यक्त होत आहे. दरम्यान, राजेगावचे माजी सरपंच राजेश राऊत, सरपंच प्रतिनिधी सोपान चोपडे, गणेश जाधव, सचिन जाधव, चंद्रकांत मेंगावडे, नागेश मेंगावडे, संदीप मेंगावडे यांनी येथील परिस्थितीची पाहणी केली.