राजेगाव, ता. २४ : आवक वाढल्याने आणि मागणी घटल्याने बाजारपेठेत भाज्यांचे दर घसरल्याचे चित्र पाहायला मिळत आहे. अनेक अडचणींचा सामना करत असलेला शेतकरी मात्र संकटात सापडल्याचे दिसून येत आहे ‌
मे महिन्यातच समाधानकारक पाऊस झाल्याने मोठ्या प्रमाणावर तरकारीची लागवड करण्यात आली. साहजिकच भाज्यांची आवक वाढली आहे, ज्यामुळे बाजारपेठेत मोठ्या प्रमाणावर पुरवठा वाढला आहे. दुसरीकडे, आषाढ महिन्यात मांसाहाराची रेलचेल असते. भाज्यांची मागणी घटल्यानेही दरावर परिणाम झाला आहे. त्यामुळे शेतकऱ्यांमध्ये चिंतेचे वातावरण आहे.

राजेगाव (ता. दौंड) आठवडे बाजारात भाजीपाल्यांचे दर किलोप्रमाणे-
हिरवा वाटाणा - ८०-१००, गवार - ५०- ६०, भेंडी - ३०-४०, हिरवी मिरची - ६०-६०, शिमला मिरची - ४०-५०, फ्लॉवर - ३०-४०, कोबी - १५-२०, कारले - ४०-५०, टोमॅटो - २०-३०, वांगी - ३०-४०, दोडका - ४०-५०, बटाटा - २०-३०, कांदे - १५-२०, लसूण - ८०-१००, लिंबू - २०-३०, आले - ४०-५०, कोथिंबीर - ५-१०, मेथी - ५-१०, शेपू - १०-१५, पालक १०-१५.

भाजीपाल्यांचे बाजारभाव घसरल्याने शेतकऱ्यांबरोबर भाजी विक्रेतेही अडचणीत सापडले आहेत. आम्ही बारामती बाजारामधून तरकारी खरेदी करतो. अपेक्षित बाजारभाव मिळत नसल्याने वाहतूक खर्चही मिळणे अवघड झाले आहे. त्यामुळे शेतकरी शेतमाल कमी किमतीत विक्री करतो.
- राजेंद्र कदम, भाजी विक्रेते.