राजेगाव, ता. २६ : वारकरी संप्रदायाची परंपरा लाभलेल्या स्वामी चिंचोली (ता. दौंड) येथे हरिनाम सप्ताह आणि ग्रंथराज ज्ञानेश्‍वरी पारायणाची सुरुवात रविवार (ता. २७) पासून होणार आहे. सप्ताहाचे यंदाचे ५४ वे वर्षे असून, सप्ताहात ग्रामस्थांनी सहभाग घेत उत्कृष्टपणे नियोजन केले आहे. अखंड वीणा, काकडा, सकाळी ज्ञानेश्‍वरी पारायण, संध्याकाळी प्रवचन, हरिपाठानंतर कीर्तन सेवा केली जाते. पहिल्या दिवशीची कीर्तनसेवा देवराम महाराज गायकवाड करणार आहेत. तर पांडुरंग महाराज घुले, उल्हास महाराज सूर्यवंशी, जगन्नाथ महाराज देशमुख, भागवताचार्य नामदेव चव्हाण, प्रभाकर बोधले, गायनाचार्य पंढरीनाथ आरू यांची कीर्तनसेवा होणार आहे. रविवारी (ता. ३ ऑगस्ट) पांडुरंग आवारकर यांचे काल्याचे कीर्तन होणार आहे. गायनाचार्य बालाजी सरकटे, नवनाथ काकडे, मृदंगाचार्य मयूर महाराज महाडीक, अक्षय महाराज कदम साथसंगत करणार आहेत. तर मंगळवारी (ता. २९) कीर्तनानंतर बालाजी महाराज शिरसाठ यांचे भारूड होणार आहे. संगीत विशारद वैष्णवी धायगुडे यांची बुधवारी (ता. ३०) दुपारी भजनसेवा होणार आहे.