राजेगाव, ता. ३० : पुणे जिल्हा परिषद, पंचायत समिती दौंड (शिक्षण विभाग) अंतर्गत तालुकास्तरीय गुणवत्ता विकास कार्यक्रमांतर्गत कार्यशाळा चौफुला येथे नुकतीच पार पडली. या कार्यशाळेला दौंड पंचायत समितीचे गटशिक्षणाधिकारी संजय महाजन यांनी मार्गदर्शन केले.
कार्यशाळेत विविध शैक्षणिक विषयांवर मार्गदर्शन करण्यात आले. यावेळी नव साक्षर महिला नंदा चौधरी (हरिबाची वाडी) व कमल जाधव (भागवतवाडी) यांना प्रातिनिधीक स्वरूपात मान्यवरांच्या हस्ते प्रमाणपत्र प्रदान केली.
दरम्यान, उल्लास नव भारत साक्षरता कार्यक्रम या उपक्रमाचा आढावा घेण्यात आला. दौंड विकास गटात २०२३-२४ व २०२४-२५ या दोन शैक्षणिक वर्षांत उल्लेखनीय कामगिरी झाल्याचे नमूद केले. तालुक्याचे उद्दिष्ट १७९१ पैकी आजअखेर ८०० पूर्ण झाले असून, उर्वरित उद्दिष्ट एका आठवड्यात पूर्ण होईल, असा विश्वास व्यक्त केला. तसेच सर्व शाळांमध्ये १५ ऑगस्ट रोजी प्रमाणपत्र वितरणाचा कार्यक्रम पार पडल्याचेही सांगण्यात आले.
तालुका समन्वयक दत्तात्रेय कुदळे, सोमनाथ बंड, संभाजी कुंभार, प्रकाश भगत, शकील पठाण यांनी विविध विषयांवर मार्गदर्शन केले. रहीम शेख यांनी सूत्रसंचालन केले. केंद्रप्रमुख संजय चव्हाण यांनी आभार मानले.