राजेगाव, ता. १७ ः पुनर्रचित हवामान आधारित फळपीक विमा योजना आंबिया बहार सन २०२५- २६ करिता पुणे जिल्ह्यात राबवली जाणार आहे. त्यातील दौंड तालुक्यासाठी केळी, आंबा व डाळिंब या तीन पिकांसाठी सहभागी होण्यासाठी https://www.pmfby.gov.in या राष्ट्रीय फळ पीक विमा पोर्टलवर विहित मुदतीत अर्ज करावेत, असे आवाहन तालुका कृषी अधिकारी अजिंक्य दुधाणे यांनी केले आहे.
यातील केळी पिकासाठी विमा भरण्याची अंतिम मुदत ३१ ऑक्टोबर, आंबा पिकासाठी ३१ डिसेंबर, तर डाळिंब पिकासाठी १४ जानेवारी २०२६ ही आहे. योजनेत सहभाग नोंदवण्यासाठी अधिसूचित फळबागांचे प्रती शेतकरी कमीत कमी २० गुंठे व जास्तीत जास्त ४ हेक्टर इतके उत्पादनक्षम क्षेत्र असणे आवश्यक आहे. सहभागी होण्यासाठी ॲग्री स्टॅग नोंदणी, आधार कार्ड, बँक खाते तपशील, जमीन धारणा उतारा, फळबागेचा जिओ टॅगिंग फोटो, भाडेपट्टीने शेती करणाऱ्यास नोंदणीकृत भाडेकरार, ई- पीक पाहणी आवश्यक आहे. अधिक माहितीसाठी नजीकच्या कृषी कार्यालयाशी संपर्क साधावा अथवा www.krishi.maharashtra.gov.in या संकेतस्थळाला भेट द्यावी, असेही कळविण्यात आले आहे.