इंदापूर, ता. २ : लोणी देवकर (ता.इंदापूर) गावच्या हद्दीतून जाणाऱ्या पुणे-सोलापूर राष्ट्रीय महामार्गावर उभ्या असलेल्या एसटी बसला मारुती इको या मोटारीने येऊन जोरदार धडक दिली. या अपघातात आठ जण जखमी झाले आहेत. यातील दोघांची प्रकृती चिंताजनक असून त्यांना उपचारासाठी खासगी रुग्णालयात दाखल केले.
महाराष्ट्र राज्य परिवहन महामंडळाची तळेगाव आगाराची बस पुणेवरून अक्कलकोटकडे निघाली होती. लोणी देवकरचे हद्दीत एसटीचा पुढील डाव्या बाजूचा टायर पंक्चर झाल्याने चालकाने बस रस्त्याच्या कडेला उभा केली. यावेळी टायर बदलत असताना पाठीमागून पुण्याकडून सोलापूरच्या दिशेने वेगात निघालेल्या मोटारीने उभ्या असलेल्या एसटी वाहनाला पाठीमागून जोराची धडक दिल्याने अपघात झाला.
मोटारीतील गजानन थिटे (वय ६५), गौरी गजानन थिटे (वय ५५), नथुराम गजानन थिटे (वय ३५), निवेदिता नथुराम थिटे (वय २६), ऋत्विक नथुराम थिटे (वय ४, सर्व रा.बहे ता. रोहा), ओम (पूर्ण नाव समजू शकले नाही) (वय ८), भगवान आबाजी तुपकर (वय ६१), भारती भगवान तुपकर (वय ५०) (सर्व रा. मुठवली खुर्द ता.रोहा, जिल्हा रायगड) हे जखमी झाले असून यापैकी दोन गंभीर जखमी असल्याची प्राथमिक माहिती महामार्ग पोलिसांनी दिली.

03656