इंदापूर, ता. ८ : इंदापूर शहरासह तालुक्याच्या विविध भागात सलग तिसऱ्या दिवशी मेघगर्जनेसह वरुणराजाने हजेरी लावली. यामुळे बळिराजा मधून समाधान व्यक्त होत आहे. तसेच या पावसामुळे टँकर सुरू असलेल्या तालुक्यातील अनेक भागातील गावांनाही थोड्याफार प्रमाणात दिलासा मिळणार आहे.
इंदापूर शहरासह तालुक्यातील अनेक गावांमध्ये गुरुवार, शुक्रवार व शनिवारी सलग तीन दिवस दमदार पावसाने हजेरी लावली. इंदापूर शहराप्रमाणे तालुक्याच्या ग्रामीण भागातही पावसाने हजेरी लावली. या पावसामुळे वातावरणातील उकाडा कमी होण्यास मदत झाली असून अशाच आणखीन दमदार पावसाची शेतकऱ्यांना अपेक्षा आहे. यंदा तीव्र उन्हाळा जाणवत होता त्यातच पाण्याची टंचाई तसेच जनावरांच्या चाऱ्याचा प्रश्‍न निर्माण झाला होता. पावसाला सुरुवात झाल्यामुळे पावसाचा जोर जर असाच राहिला तर काही अंशी ही टंचाई कमी होणार आहे.
शनिवारी (ता. ८) देखील इंदापूर शहर व ग्रामीण भागात पावसाने हजेरी लावली. दुपारपासून पावसाला सुरूवात होत असून रात्री उशिरापर्यंत हा पाऊस बरसत आहे. वादळी वाऱ्यासह पावसाला सुरुवात झाल्याने अनेक गावे रात्रभर अंधारात राहत आहेत. शहरात देखील दिवसभर वीजपुरवठा बऱ्याच वेळा खंडित होत होता. मे महिन्याच्या शेवटच्या आठवड्यापासून पावसाला सुरुवात झाली असून मॉन्सून देखील चांगला होईल, असा अंदाज शेतकरी व्यक्त करीत आहेत.