सोमेश्वरनगर, ता. ३ : संत सोपानकाका महाराजांच्या पालखीचे सासवडहून प्रस्थान झाले. या पालखीच्या मुख्य रथाचा भार सोरटेवाडी (ता. बारामती) येथील केंजळे परिवाराने पाठवलेल्या बैलजोडीच्या खांद्यावर आहे. केंजळे परिवारातील चौथ्या पिढीने बैलजोडी देण्याची ही परंपरा जपली आहे. तसेच, सोरटेवाडीतीलच कुलकर्णी परिवाराने दिलेली बैलजोडी नगाऱ्याची गाडी ओढत आहे. बैलजोडीचे पूजन शेतकरी कृती समितीचे नेते सतीश काकडे, जिल्हा परिषदेचे माजी बांधकाम सभापती प्रमोद काकडे, राजहंस पतसंस्थेचे महाव्यवस्थापक विजयकुमार सोरटे यांच्या हस्ते करण्यात आले. याप्रसंगी सोमेश्वरचे संचालक ऋषी गायकवाड, पांडुरंग राजवडे, माजी सरपंच वैभव गायकवाड, दत्तात्रेय शेंडकर, नामदेव गायकवाड, शहाजी जगताप, श्रीपाल सोरटे, बिंटू शेंडकर, माणिक लकडे, पिंटू मासाळ, विजय राजवडे आदी पंचक्रोशीतील लोक उपस्थित होते.