सोमेश्वरनगर, ता. २५ : बारामतीच्या पश्चिम पट्ट्यात सुरू असलेल्या मुसळधार पावसाने शेतांना तलावाचे स्वरूप आले असून ओढे, नाले, चाऱ्या पावसाळ्यासारखे दुथडी भरून वाहू लागले आहेत. यामुळे शेकडो एकर क्षेत्रावरील पालेभाज्या, फळभाज्या अशी तरकारी पिके अक्षरशः नष्ट झाली आहेत. वाणेवाडीत शेतांना तळ्याचे स्वरूप आले आहे.
होळमधील आघारकर कृषी संशोधन केंद्रावर तब्बल २८१ मिलिमीटर इतक्या अठ्ठावन्न वर्षातल्या विक्रमी पावसाची नोंद झाली आहे. यामुळे शेतकऱ्यांनी नुकसान भरपाईसाठी पिकाचे पंचनामे करण्याची मागणी केली आहे.

बारामतीत आज (ता. २५) सकाळी आठ वाजता अठ्ठेचाळीस तासात १५० मिलिमीटर पावसाची नोंद झाली. आतापर्यंत मे मध्ये एकूण २८१ मिमी पाऊस नोंदला तो ३०० पेक्षा अधिक होणारच आहे. सोमेश्वर मंदिराजवळील मोठा तलाव निम्मा भरला आहे. तो भरण्याआधीच करंजे ओढ्यातून मोठा प्रवाह वाहतो आहे. शेंडकरवाडी-कर्चेवाडी मार्गाने जाणाऱ्या ओढ्याला प्रचंड पूर आल्याने सोरटेवाडी व कर्चेवाडीमधील काही घरे पाण्याखाली गेली होती. सस्तेवाडी ओढ्याचे पाणी नीरा-बारामती महामार्गावरून वहात होते. या ओढ्यांचे पाण्याने नीरा नदीही जोरदार वाहू लागली होती. दरम्यान, शेंडकरवाडी येथे दोन तलावांची कामे करताना पावसाच्या पाण्याचा निचरा करण्याच्या जागा नष्ट करण्यात आल्या. त्यामुळे अनेक घरांमध्ये पाणी शिरले आहे. यामुळे संबंधित कंत्राटदारांवर कारवाई करण्याची मागणी होत आहे.
दरम्यान, परिसरातील टोमॅटो, वांगी, कारली, दोडका, काकडी अशा प्रमुख फळभाज्या आणि कोथींबीर, मेथी, पालक, कोबी, फ्लॉवर, मिरची आदी पालेभाज्या जवळपास संपल्यात जमा आहेत. शेताची अक्षरशः तळी झाली आहेत.

अतिवृष्टीमुळे सर्व पिके हातची गेली आहेत. त्यामुळे शासनाने तातडीने पंचनामे करून नुकसान भरपाई द्यावी, अशी मागणी पोपटराव बेलपत्रे, शिवाजी शेंडकर, शशिकांत जेधे आदी शेतकऱ्यांनी केली आहे.

आघारकर संशोधन केंद्राच्या नोंदी
तारीख पाऊस (एमएम)
२२ मे ९०
२३ मे २४
२४ मे ७०.५
२५ मे ८०.८
04585